Homber condena na 9 luna pa cumpra arma pa protege su mes

Den ultimo lunanan diferente persona mester a presenta dilanti mesa pa caso di posesion di arma di candela. Recientemente tabatin un caso di un hoben kende despues di a wordo condena pa un caso asina y a haya castigo condicional, a bolbe wordo aresta cu arma. Diabierna tabatin un caso pero di un persona grandi caba, kende tambe a wordo haya cu arma di candela. E tabatin hopi miedo pa e wordo maltrata, manera cu a sosode algun tempo prome pa cual el a dicidi di adkiri un arma di candela.
Tabata trata aki di e homber AZL di 45 aña, kende a wordo haya cu arma di candela y bala na su cas, scondi den un rugtas.

Durante tratamento di su caso den Corte, el a bisa cu el a wordo maltrata dos biaha pa cual e ultimo biaha e mester a bay Colombia unda el a pasa den dos operacion y mester a hinca un plachi hero na su cachete.  E tempo ey, ademas di e sla na su cachete, el a sufri un schedelbasis fractuur.

Debi na e hecho ariba menciona, ora cu el a bolbe di Colombia el a dicidi di busca un arma di candela “pa defende mi mes. Mi sa cu e ta prohibi, pero e situacion cu mi a pasa aden a ponemi haci esaki.” El a splica Hues tambe cu no t’asina cu e ta cana cu e arma di candela. Normalmente e ta warda esaki den kluis. Solamente ora cu e ta sinti su mes insigur, e ta saca esaki y pone banda unda e ta drumi. Y esaki ta principalmente fin di luna, ora cu tin hopi hende burachi.

El a splica cu loke el a haci a pone cu tur hende ta rabia cune, inclusive su tres yiunan. E no ta hayando bishita na KIA, cual ta haci e situacion hopi duro p’e.

Fiscal a bisa e acusado cu su splicacion ta haci cu e por compronde su situacion, pero e no por kita afo cu posesion di arma di candela, sin permiso, ta ilegal. E no por haci otro cu pidi Corte impone un castigo di 9 luna incondicional.

Huez a dicidi di schors e caso un rato, pa e pensa riba e demanda di fiscal. Na final el a haya cu e acusado ta culpabel di e delito pa cual e ta wordo acusa. “Bo mester compronde cu e acusacion contra bo ta un delito serio. Toch e ta tene cuenta cu su circumstancia personal y a impone e 9 luna pidi, pero 2 luna ta condicional y dos aña di prueba. E acusado a bay di acuerdo y lo no apela.

Leave a Reply

Top