Homenahe n’e genero Musical Salsa na Biblioteca Nacional Aruba

E conocido Nestor cultural, linguista y literario, Mirto Lacle tabatin un conferencia di prensa unda el a anuncia cu Biblioteca Nacional Aruba, Departamento di Cultura Aruba, Instituto Pedagogico Arubano a invita pueblo en general pa bin presencia un charla titula: “Salsa, di Caribe pa Mundo”.

Tambe tabata presente n’e conferencia aki, un baluarte den persona di Jose (Joe) Dania. T’asina  cu diahuebs awor na BNA cuminsando pa 6.30 lo tin un anochi di conmemoracion, pero tambe di homenahe, tributo, treciendo algun di nos baluartenan bao di luz.

 

Segun Mito Lacle, dia 9 di october, a celebra e Resistencia Indigena, dia 12 ta recorda loke ta ser yama Dia de la Raza, of Dia di Hispanidad, otronan ta considera e dia aki di descubrimento di America, pero hopi di nos sa cu America tabatey caba ora cu e Europeonan a yega.

Pero despues e Africanonan tambe a yega Caribe, pa bin labora aki banda.

Manera Gabriel Garcia Marquez ta bisa, cu e confluencia di raza a sa di trece e hendenan aki hunto a sali for di un di e tragedianan grandi, unda masha hende a keda masacra.

 

Pero e bunita di e confluencia di raza ta, a trece masha hende creativo, unda tambe musica, cu a trece hende hunto. Pesey diahuebs awor, Mirto Lacle lo hiba un charla, despues di un estudio profundo, pa loke e musica a bira salsa.

Tin hopi pregunta, kico a conduci na salsa, kende a trece, etc.

Durante e charla aki hunto cu e documentario “El Museo de la Salsa’ a keda presenta na juni durante Congreso di ACURIL-2017 na Condado Hilton na Puerto Rico. Tambe el a haci un presentacion di dicho charla y un documentario cu el a traha y presenta na Arubahuis na Den Haag.

 

Jose (Joe) Dania, un persona cu a recicla hopi di productonan local, y manera Mirto Lacle a bisa ta hopi el a siña di dje. Joe Dania a hiba hopi di nos hendenan cu su rima, a cant’e y asina a siña conoce Joe Dania como un baluarte di e pueblo aki. Ta intencion pa diahuebs awor, Joe Dania lo duna tambe lectura di su experiencia di su proverbionan.

Leave a Reply

Top