Hopi sentimento di orguyo pa Padu y Aruba cu Plaza Padu y Centro di Gobernacion renoba

 

Comentarionan positivo tabatin di e evento cu a wordo hinca den otro pa inauguracion di Plaza Padu y desvelo di e estatua di Padu Lampe, Rufo Wever hunto cu Lio Booi.

E ceremonia a crea un sentido di orguyo y patriotismo den e pueblo Arubiano presente y tambe esnan cu a experiencia e evento via television.

Esnan cu a sigui e transmision via TeleAruba por a mira cu e Plaza tabata completamente yen cumpliendo asina cu e slogan “Hunto pa Padu”.

 

Nathalie Wever, un di esnan presente, a gradici cu ta duna honor na Padu awor cu e ta na bida ainda. El a haya e anochi uno hopi exitoso mirando e multitud cu a acudi n’e evento cu a tuma lugar net panort di Bestuurskantoor.

Tambe el a bisa cu Plaza Padu ta un lugar cu por bishita y admira con esaki a keda, complementando asina cu e plan total di Gobierno pa renobacion di Centro di Ciudad.

 

“Mi ta haya hopi great cu ta duna atencion na nos cultura y ta bunita cu ta enfoca riba esaki”.

Enuar Posso ta comparti e pensamento di sra. Nathalie Wever, pa honra Padu awor cu e ta na bida. “Mahestral”.

E plaza ta keda como un bunita recuerdo p’e famia di Padu y tambe un bunita atraccion pa turista.

Di e forma aki no por lubida esnan cu a scirbi e himno bunita di Aruba,” Enuar Posso a bisa.

 

E reconocemento na Padu naturalmente tabata bon mereci y yena di emocion, cu e no por a evita lagrimanan den su wowo.

Plaza Padu, ta situa panort di edificio Cocolishi, esta mey-mey di e cede gubernamental y otro edificionan monumental manera Fort Zoutman y Willem III, Censo y edificio di Algemene Rekenkamer.

Na momento cu e luznan a cende diabierna anochi pa ilumina e edificionan y e fontein riba e plaza, tur cos a mustra “impresionante y espectacular. Mi no a spera algo asina bunita haci pa y door di nos mes hendenan.

Ora cu bo yega riba Plaza aki ta parce cu bo no ta na Aruba. Henter e set-up cu un podium y un orkesta grandi a mustra impactante.

 

Sinta den stul, como invitado, bo ta sinti un sentimento di orguyo pa tur e hendenan cu a traha duro  pa presenta algo asina bunita.

Cu e plaza aki Aruba no tin nada di envidia ningun pais na mundo. Aruba tin hopi cos di ofrece y di calidad. Ademas ta honra tres persona.

Pesey mi kier felicita Gobierno, e pueblo cu a acudi masalmente y e organisadornan pa un anochi asina bunita,” e ciudadano Atan Lee a bisa.

Contenido di e anochi tabata bon hinca den otro, cu a haya admiracion di artistanan cu tabata presente, no pa traha, pero duna apoyo n’e honor otorga na Padu, e unico di e tres autornan di himno nacional di Aruba cu ta na bida ainda.

 

Ruthy Vrieswijk ta un persona cu ta sinti un admiracion grandi di Padu y a bisa cu e ta sigur cu Padu no solamente a gosa y a sinti den profundidad di su alma cu e anochi tabata uno special. “Padu a haya hopi homenahe den su bida, pero esaki ta esun mas grandi.”

Tambe e tabatin palabra di elogio p’e artista cu a crea e estatua di e trio di compositor di nos Himno, Aruba Dushi Tera, Ciro Abath.

 

 

Top