Huez a confirma cu no tabatin motibo pa bay den accion, p’esey ayera Huez a ordena trahadornan di Arubus pa reanuda nan trabao di inmediato of lo tin cu paga suma impone

 

 

 

Manera tabata di spera, Huez a ordena trahadonan di Arubus pa nan bay traha y duna un prohibicion di bay den accion y/of blokea entrada.

Tambe si e trahadornan y nan sindicato, STA no cumpli, a impone un dwangsom pa cada ora cu nan no reanuda trabao.

 

Prome cu e caso a ser trata den Corte, Mediador di Gobierno, kende a ser poni na altura di e situacion for di diahuebs anochi, a invita e partidonan pa sinta y wak con por evita e paro, pero debi na capricho, demostracion di forza, STA a pidi e trahadornan pa ayera mainta bandona pia di trabao, perhudicando asina sigur un cantidad grandi di mucha di skol y trahadornan cu ta usa e medio di transporte aki pa bay trabao.

 

Trahadonan di Arubus a pone e compania plat, despues cu un reunion e anochi prome a pega formalmente. Entre e motibonan di e accion aki, t’e mal estado di e flota di bus cu e trahadonan tin cu core aden tur dia.

Fuera di esey, STA kier discuti asunto salarial, cu ta pega pa algun aña caba.

E reunion aki, no a dura ni 10 minut diahuebs y a menasa otro, cu e posibilidad pa demostra forza.

 

Despues cu Huez a manda STA y e trahadornan pa reanuda trabao, e partidonan a bay bek na Mediador di Gobierno pa prepara un protocol, cu ambos a firma, despues di a haci algun cambio. Den grandes liña, tin para den e protocol, e periodo pa discuti tur diferencia di opinion cu por tin.

Cu lo no tin problema pa ningun chofer di Arubus, cu ta bisa cu nan no tin rijvergunnning pasobra el a caduca.

Top