Huez y Corte a desbarata tur motibo pa cual Alpha Printing y Ralph Maduro a pidi pa rectificacion di 24ora

Pa Corte e demanda di Alpha Printing NV y Ralph H. Maduro no tabatin suficiente base pa bay di acuerdo cune. Net contrario, e veredicto ta bisa cu Tera News y Headlines Group a trece suficiente dato cu ta mustra riba e relacion entre famia Maduro y pareha Oduber

E caso aki a wordo cuminsa dor di Maduro despues cu e website 24ora a publica di supuesto manipulacionnan den e compania Arubus, dor di e Minister encarga e tempo ey y cu ayudo di e pareha (o ex pareha) di Maduro cu a haci cu e compania Alpha a haya contracto di Arubus.

 

Maduro cu no tabata di acuerdo cu e decision aki a pidi Corte ordena 24ora y Headlines Group rectifica e articulo publica. E motibo ta cu Alpha Printing ta sinti cu e media a pasa e limitenan di libertad di prensa y a actua inhustamente pa cu nan, y cu dor di esaki nan a sufri daño.

Huez ta cuminsa pa bisa den su veredicto cu otorgamento di e peticion di Alpha pa rectificacion ta un limitacion riba e derecho fundamentl di libertad di expresion cu ta duna tur hende, tambe na Headlines Group, segun Constitucion di Aruba.

Esaki por wordo limita, solamente si tin un provision den ley p’esaki y si den un estado di derecho democratico esaki ta necesario, e.o. pa proteccion di e bon nomber of derechonan di otronan.

 

E veredicto ta bisa cu e publicacion por ta fastioso p’e persona envolvi of hasta por ta dañino, pero e ta un consecuencia di e espacio amplio cu ta existi den un comunidad democratico y liber manera esun di nos cu ta duna libertad di expresion na prensa.

Principalmente den e comunidad Arubano, Huez ta bisa, ta conta cu prensa tin un funcion importante pa trece den publicidad conflictonan di interes di politica – sin importa e signatura politico – y den mundo empresarial y duna di e forma aki un contribucion na transparencia di Gobernacion.

 

Huez ta splica den e veredicto e formanan con ta evalua e caso, e criterianan cu ta wordo uza pa yega na un decision. Ta wordo menciona e indole di sospechonan publica y e seriedad di e consecuencianan spera p’esnan riba kende e sospecho ta cay; e seriedad – mirando for di bista di interes general – di loke ta wordo cuestiona; e forma di sosten cu e acusacionnan tin pa loke ta pruebanan y asina tin varios forma con e peticion a wordo evalua.

Pero tambe tin otro circumstancianan cu ta keda cuenta cune. Loke ta bay pone den balans ta kico ta pisa mas: E libertad di expresion di Headlines y di otro banda e derecho den Constitucion di privacidad di Alpha Printing (su bon nomber y reputacion).

 

Tambe a bin dilanti cu pa Europese Hof voor de Rechten van de Mens (EHRM) libertad di expresion ta wordo mira como un instrumento importante pa un comunidad democratico, den cual prensa ta hunga un rol vital como e “watchdog”.

Pesey expresionnan den prensa, en principio, p’e motibo aki riba menciona por ta “schokkend”, preocupante y ofensivo.

E forma con prensa ta haci su trabou di “public watchdog” ta liber.

 

Pa loke t’e publicacion en cuestion, ta uno cu a aparece riba e website 24ora.com y tabata dirigi principalmente riba ex Minister Otmar Oduber. E articulo ta papia di un falta di transparencia y concurencia den contractnan di un NV, cu ta wordo financia dor di Gobierno y posibel conflicto di interes entre Oduber, como e Minister responsabel y como particular.

E posibel conflicto di interes ta bira pio entre su funcion como Minister y mundo comercial, mas ainda den otorgamento di licencianan a uzo di logo Äruba”.

 

Esakinan ta temanan hopi serio cu den e temporada di campaña aki mester por wordo cuestiona. Alpha Printing ta bisa cu nan no ta amigo ni socio di Oduber.

Headlines ta bisa cu ta di conocemento general. Headlines tambe ta bisa cu e pareha di Maduro, esta sra. Roga,hunto cu e casa di Oduber a forma un NV na maart 2002 bou di e number di Graphi-x and Beyond, cua NV ta traha riba diseño, produccion y comercialisacion di borchinan di propaganda y articulonan.

Roga tambe a lanta e eenmanszaak bou di e mesun number na october, 2002.  Ambos empresa ta registra na Avenida Milio Croes 25, unda tambe ta situa Lemelitos NV (Drop ‘n Nuts), di cual e suegra di Oduber ta Director y cual percela ta su propiedad.

 

N’e mesun adres aki ta registra Damox NV di cual Maduro ta Director. ATA a otorga Damox un licencia pa uso exclusivo (branding) di e conocido logo Aruba di ATA. E tempo ey ATA ta cay bou responsabilidad di Oduber.

Dia 24 di juni, 2011 ATA a haci anuncio publico cu permiso pa comercilisacion di mercancianan cu e logo di Aruba a wordo otorga na Graphix & Beyond, estableci na Avenido Milio J. Croes 25, di sra. Roga.

Cu tur ariba menciona, Headlines no a pasa e limite di libertad di expresion. Tin suficiente interogatorio den e relacion entre famia Maduro y pareha Oduber. Headlines tin derecho di cuestiona esaki.

 

Tambe ta evidente cu sra. Roga como miembro di Hunta Comisario di Arubus tin informacion di decisionnan cu ta wordo tuma. Y hasta un miembro por influencia un decision.

A base di tur ariba menciona, ta rechasa e demanda di Alpha Printing.

Leave a Reply

Top