Hulanda Caribense a cuminsá cu campaña di informacion tocante Eleccion di Tweede Kamer

 

KRALENDIJK – Rijksdienst Caribisch Nederland (RCN) ayera a lansa un campaña di informacion, riba e eleccionnan di Tweede Kamer, cu lo tuma lugar dia 15 di maart próximo na Bonaire, Saba y Sint Eustatius.

E campaña lo core pa 4 siman y tin como tema: ‘Mi voto ta determiná nos futuro’. Lo informá e electorado (votadornan) di e tres islanan cu e eleccion ta tuma lugar y cu decisionnan tumá den Tweede Kamer tin influencia riba e habitantenan di e islanan.

 

E campaña tin dos fase. Den promé fase e tareanan di Tweede Kamer ta pará central. Ta splica con decisionnan cu Tweede Kamer ta tuma, riba por ehèmpel cuido médico, compensacion pa yiu, financiamento di estudio y e normanan di seguridad na trabou tin consecuencianan directo p’e islanan.

E di dos fase ta cuminsá despues di mas o ménos dos siman y ta informá riba e proceso di votacion mes.

Ta splica cua documento ta necesario pa por vota, unda por vota, orario cu por vota y con ta vota pa medio di un poder di voto.

 

P’e campaña, RCN ta uza un variedad grandi di material: Poster, spòt pa radio, spòt pa television, anuncionan den corant, foyeto, billboard digital, banner, wèbside di RCN y un página di Facebook.

E gruponan di enfoke di e campaña t’e votadornan na Bonaire, Saba y Sint Eustatius.

Pa alcansá un grupo mas grandi posibel, e campaña ta uza un cantidad amplio di modelo cu ta representá diferente grupo étnico, edad y ámbos sexo.

 

E modelonan ta dirigí nan mes na Papiamento, Hulandes y Ingles na un manera intenso riba e votadornan. Pa logra ainda mas reconocemento, tambe lo uza modelo cu ta representá hende grandi, hende cu ménos habilidad y e votadornan cu ta bay urna pa promé biaha.
E campaña di RCN no ta duna informacion riba e partidonan político cu ta participá n’e eleccion ni tampoco ta duna informacion riba nan programa electoral.

 

Habitantenan di Hulanda Caribense por haña e informacion ey, via e partidonan mes. E partidonan tin wèbside cu ta incluí nan programa electoral. 28 Partido lo participá n’e eleccion di Tweede Kamer. Personanan cu tin derecho di voto, por vota riba 17 partido.

Top