Husticia ta resolve 8 atraco pisa

Bao guia di Ministerio Publico, Cuerpo Policial di Aruba a soluciona e luna aki 8 caso di atraco arma grandi.

Ta trata di e atraconan arma na november y december aña pasa y na januari ultimo riba La Estrella, riba Gemstones Jewelers, riba cas di e doño di Lekker Bar en Restaurant, y riba un trahador di SandBar Beach Bar.

 

Den e casonan aki tin 9 sospechoso den detencion, bao di cual Arubiano y Venezolanonan.

E sospechosonan en cuestion a wordo deteni na december y januari.

E sospecho ta cu e grupo, cu tabata encabeza pa personanan biba na Aruba, a actua den combinacion cada biaha diferente, segun un comunicado di Ministerio Publico ayera tardi.

 

Banda di esey, KPA, bao guia di Ministerio Publico, a soluciona 4 atraco extremadamente violento na San Nicolas riba personanan di edad halto.

Den e atraconan aki, cu a tuma lugar na januari, un pareha grandi y dos cabayero a wordo ataca den nan casnan, y un grandi a wordo ataca riba caya. A usa violencia bruto.

Den e casonan aki tin 4 persona den detencion, tur Arubianonan hoben di entre 17 y 19 aña di edad.

 

E investigacionnan ta ainda andando. Mas detencion, particularmente pa loke t’e grupo Arubiano/Venezolano, no ta wordo exclui, segun Ministerio Publico den su comunicado ayera tardi.

Top