Hyatt cu caminata pa benificia SGT Pepper’s Friends y ARF

E luna aki ta luna mundial di Hyatt Thrive, un iniciativa di e compania pa cumpli cu su responsabilidad social e. o. dor di organisa actividadnan pa recauda fondo y duna bek na comunidad.

 

Pa e aña aki Hyatt a scoge pa tene un actividad p’asina duna sosten na dos fundacion cu ta combati un problema clave riba nos isla. Mirando cu hopi ta e pushi y cachonan cu ta biba riba caya abandona ta sufri di hamber y enfermedadnan.

Riba 22 di april proximo, Hyatt Aruba lo tene un caminata pa recauda fondo pa dos fundacion cu ta dedica hopi tempo na nos amigonan di cuatro pata: SGT Pepper’s Friends y ARF. Sigur dos fundacion cu ta duna hopi bek na nos comunidad.

 

SGT Pepper’s Friends ta un fundacion cu a cuminsa cu simplemente kitando un cacho for di caya cu tabatin mester cuido y un hogar.

E cacho aki, SGT Pepper, a inspira su doño pa sigui yuda mas bestianan den necesidad. Hopi ta e cacho y pushinan cu nan ta kita tur dia for di ariba caya. Nan ta desea di tin un centro na unda nan por rehabilita e bestianan prome cu busca un hogar permanente pa nan. Sigur no ta facil pa un organisacion logra un proyecto asina sin donacion y/of ayudo.

 

ARF ta un fundacion cu tin un meta similar na esun di SGT Pepper’s and friends, un organisacion cu ta recauda fondo pa asina ofrece cuido pa cacho y pushinan abandona. Interesante ta cu e fundacion aki a wordo lanta pa turistanan preocupa pa e cantidad grandi di bestianan cu ta biba riba caya sin cuido.

ARF, ‘Animal Relief Foundation’ tin shete aña di existencia y ta brinda cuminda y cuido veterinario pa e cacho y pushinan cu asina desesperadamente mester di dje. Hopi di nos bestianan neglisha, awor tin un hogar feliz cerca un famia cu lo por brinda e cuido.

 

E obhetivo di e caminata aki ta pa duna nos apoyo na dos fundacion cu ta combati tur dia un problema hopi grandi den nos comunidad, cual ta busca un hogar y cuido pa cacho y pushinan abandona for di riba caya.

Dunando nos amigonan di cuatro pata e cuido cu nan merece. Ta sigur di admira y gradici tur esnan cu por duna sosten na e evento ‘Run and Walk for Paws’ p’asina yuda cu un bon causa. Ban hunto cana y/of core pa un miho cuido pa nos bestianan abandona.

 

Bishita e Facebook page di Hyatt Aruba pa mas informacion: https://www.facebook.com/hyattregencyaruba.

Top