ILT di Hulanda a constata cu Aviacion Civil di Corsou ta mal bruha y e entidad no tin ni un structura legal

Un raport a wordo traha e luna aki dor di “Inspectie Leefomgeving en Transport”(ILT) despues cu un delegacion a bishita tanto Corsou como Aruba, pa haci un control riba e sistema di funcionamento di Departamento di Aviacion Civil (DAC) di Aruba y Curacao Civil Aviation Authority (CCAA).

E resultado ta cu Corsou ta pio para cu Aruba. Aunke Aruba ta haciendo e controlnan necesario, e delegacion di ILT ta haya cu mester tin un mihor sistema unda no solamente ta haci e control pa funcionamento diario di e ekipo, pero tambe otro aspectonan di un compania di aviacion cu ta importante.

Basa riba esaki a yega na un palabracion unda cu ILT ta haya e autoridad pa yuda ambos entidad pa mehora nan funcionamento.

 

E expertonan di Hulanda a conclui cu e entidad CCAA no tin suficiente garantia legal. Ademas di esaki, algun aspecto di leynan di Corsou no ta cumpli cu e normanan internacional.

Ta wordo bisa cu CCAA no ta dispone di suficiente personal specialisa, e structura no ta suficiente bon y no tin un bon maneho.

Segun a wordo splica, no tin un structura di e organisacion cu ta traha a base di decreto y no leynan, pa cual e funcionarionan ta actua a base di incidentenan.

 

CCAA a traha un businessplan cu a wordo entrega na Minister di Corsou, pero no a wordo aproba. E plan aki tin e meta pa pone Corsou bek den categoria 1 di FAA.

Otro mehoracionnan cu mester bin no ta forma parti di e plan aki.

Mayoria di e Inspectornan di Seguridad ta traha a base di contracto. Gran mayoria di e inspectornan tin experiencia limita y tin entre 1 y 2 aña di servicio.

E capacidad di e controlador ta temporalmente limita pa motibo di e investigacionnan cu tin andando riba comportacion di Inspecteurnan y como consecuencia e inspectornan aki no ta wordo uza.

 

Tambe ta bin dilanti cu CCAA ta ehecuta principalmente inspeccionnan di plataforma. Auditnan basa riba un sistema (di nivel)  no ta wordo ehecuta, pa cual e imagen di InselAir serca CCAA ta limita.

E conocemento riba control di sistema ta keda limita. Tin proceduranan di trabou interno den e “handboek”pa Inspectornan, pero e buki aki ta haci referencia na normanan cu no ta aplicabel aki.

 

Despues di e bishita, e delegacion di ILT a conclui tambe no tin un separacion, of un posicion suficientemente independiente di CCAA pa loke ta InselAir International (IAI).

A constata cu IAI no ta cumpliendo cu partinan escencial di leynan di aviacion, pa cual e ta creando un riesgo grandi di seguridad (pa cual Hulanda a prohibi su funcionarionan di biaha cu e compania aki).

E sistema di control di CCAA no a logra evita e riesgonan aki. Banda di esey, ILT no a haya suficiente bista riba e acuerdonan cu otro companianan di aviacion riba lease di avionnan.

E falta di un autoridad structura tin su efecto den sector di aviacion.

 

Pa haci e situacion pio IAI no ta cumpli cu e leynan local di aviacion. E leynan aki ta aplicabel desde october 2015.

Desde september, 2016 por bisa tin un control regular riba IAI dor di CCCA den forma di inspeccionnan di plataforma.

P’e motibo aki a yega na palabracion cu Ministernan di Corsou y Aruba, sra. Suzy Romer y Mike de Meza, respectivamente pa yega rapidamente na un protocol di cooperacion y palabracionnan formal (huridico) riba e autoridad di ILT pa mas liher posibel yuda drecha e situacion ariba describi.

Top