Ing Marlon Croes di DOW: Green Corridor y Watty Vos Boulevard ta e proyectonan infrastructural mas grandi di ultimo 50 añanan

Dialuna ultimo, otro proyecto grandi y positivo di Gabinete Mike Eman II a inicia. Ta trata di groundbreaking di e rotonde grandi na Cumana, cu ta forma parti di Watty Vos Boulevard.

Den e proyecto tin en total 10 rotonde diseña cu lo mester mehora e fluho di trafico di Aruba, cu a crece inmensamente ultimo 25 añanan, p’e parti pabou di brug.

Dunando su importancia na e proyecto di Watty Vos Boulevard tabata presente na e ceremonia di groundbreaking Prome Minister Mike Eman, Minister di Infrastructura Benny Sevinger, Minister di Asuntonan Economico Richard Arends, varios miembro di Parlamento di Aruba y invitadonan.

 

DOW y su director ing. Marlon Croes ta hopi envolvi den realisacion di WVB via e sistema Private Public Partnership (PPP) y den e caso aki e partner di Gobierno ta Mota-Engil.

Antes e proyecto aki tabata conoci como Ringweg 3 y bou di Gabinete Mike Eman II a dicidi di dedica e proyecto na Watty Vos, cu pa hopi aña a traha pa realisa esaki na bienestar di Aruba.

“Tempo cu mi a cuminsa traha na DOW na aña 1989, ya caba tabata papia di Ringweg 3.

Na 1995 mi director Jossy Figaroa a pidi pa guia e proyecto aki.

Pues nos tin hopi tempo trahando rib’e proyecto aki, for di tempo di Domeinbeheer, ora cu a negocia compra di diferente tereno pa haci e ruta liber p’e proyecto. E tabata un caminda largo y cu nos a bin cla cu e ultimo parti na 2014. Esey a permiti nos cuminsa cu e proceso di un destaho via di e sistema di PPP”, ing. Marlon Croes a splica durante e ceremonia di groundbreaking.

 

Den transcurso di aña e trafico di Aruba a crece masha hopi. El a splica cu na aña 1995 tabatin alrededor di 25 mil auto, mientras cu awendia ta papia di 77 mil auto, un triplificacion. Ciudadanonan ta haci uzo di nan auto pa bay scol, traha, pero tambe ora di socialisa, loke ta trece filanan largo den trafico di Aruba, practicamente den tur skina di Aruba.

E situacion aki a haci necesario un renobacion di e sistema di caretera di Aruba.

Den esaki Ringweg 3, awor Watty Vos Boulevard, mester trece un alivio grandi den e congestion di trafico. E ta bay suavisa e trafico riba L.G, Smith Blvd, move e trafico for di Kibaima /Tanki Flip y hibe pa Ringweg 3.

 

Ademas di esaki, tur e trafico cu ta pasa e caminda di Jaburibari, Calabas, Kudawecha y Sabana Liber ta haya oportunidad di uza Watty Vos Blvrd pa yega Playa of area di hotelnan.

Ing. Marlon Croes a bisa tambe cu “conhuntamente cu Green Corridor y Watty Vos Blvd, Aruba ta creando un “backbone” grandi den infrastructura di Aruba, unda ta creando un miho acesibilidad for di San Nicolas pa Playa y area di Palm Beach.

 

“Nan ta e proyectonan infrastructural di mas grandi cu Aruba a conoce e ultimo 50 añanan.

Pa nos di DOW e ta un reto grandi, pero cu un bon team y bon cooperacion nos ta logra hopi. Esaki ta loke e team a bin ta haciendo e ultimo 7 añanan desde nos a cuminsa uza e sistema di PPP (Private Public Partnership).

Leave a Reply

Top