“E caminda di Sabana Basora no por a wordo gelapi mas”

Despues di e yobida fuerte a constata cu no por lapi mas e caminda di Sabana Basora.

Tabata necesario pa construi un caminda completamente nobo y Gobierno a dicidi di move esaki rib’e lista di prioridad. E fondonan a wordo aproba den e ultimo dianan di 2016 y e trabounan, realisa door di BIC NV, a cuminsa dialuna ultimo den presencia di Prome Minister Mike Eman y Minister di Infrastructura Benny Sevinger.

 

E caminda di Sabana Basora direccion Franse Pas y Mondi Fierno tabata riba lista pa wordo drecha pa hopi tempo caba, segun director di DOW ing. Marlon Croes a splica na e sitio.

“E ta un caminda cu a wordo gelapi den forma basta frecuente e ultimo añanan y el a yega na e bida maximo cu por a saca for di dje. Gobierno a pone e fondonan necesario y e trabou a wordo entrega despues di un destaho publico na BIC NV”, Croes a bisa.

 

Despues di a haci un analisis di loke mester wordo haci, a programa cu e proyecto mester wordo ehecuta den 135 dia laboral. Pa e distancia di un poco mas di 1 kilometer, for di e rotonde te na e crusada cu ta bay pa e santana, Ministerio di Infrastructura di Minister Sevinger a pone un suma di 1.1 miyon florin disponibel. E suma aki ta pa construccion di e caminda nobo cu su banchi na banda, y un meter di asfalt na cada banda pa proteha e caminda nobo durante yobidanan.

El a bisa tambe cu den negociacion cu e contratista a yega na e palabracion cu ora tin poco hende na cas, ta haci mayoria di trabou. Despues di 4’or e caminda mester ta den un forma cu e por wordo uza dor di e habitantenan di e bario pa nan yega nan cas.

 

“Esaki ta un di e medidanan cu nos a tuma pa nos por suavisa e periodo di molester durante e tempo di construccion. E ta debi tambe cu nos tin mas trabou tumando luga den bisindario den e proyecto di Green Corridor, manera e brug y e mita rotonde na Drive In, cu lo nifica cu pronto mester cera e parti ey tambe pa finalisa cu e rotonde. Nos ta trata di sincronisa e proyecto di Sabana Basora cu esun ariba menciona pa tin menos molester posibel pa e automobilistanan.”

El a agrega cu na momento cu cera e caminda grandi, ta duna indicacion di e rutanan alternativo.

Despues cu BIC NV finalisa su trabou, DOW ta tuma na su encargo e resto di caminda te na e “duikers” di Rooi Taki cu tambe ta bay wordo drecha.

Top