Ingmar Ramharakh ganado di campaña “Bring a lifesaver”

 

Raymond Maxwell, Vocero di Stichting Bloedbank Aruba a expresa su satisfaccion cu resultado di e campaña “Be a Livesaver” cu entretanto a yega su parti final.

“Nos ta hopi contento paso “Be a Livesaver” tabata un tremendo campaña. Nos a enfoca pa logra yega 300 donante na 2016 y nos a yega un total di 400 donante. Asina ta nos ta masha contento mes cu e donantenan cu a aplica durante 2016 y alabes tur donante cu pa añanan largo ta haci e bunita trabou di “Lifesaver”, Maxwell a bisa.

 

Mas leu Stichting Bloedbank Aruba a sigui bisa cu “wel  na 2017 nos ta bay pa 400 y mas e ora. Cantidad di donante ta hopi importante pasobra World Health Organization ta pidi pa 5% di bo populacion ta donante di sanger. Esey ta mas o menos 3800 donante y awor nos tin 1743.

Pues pa e motibo aki nos ta sigui stimula un y tur pa bira donante.

 

Dia 31 di januari un di nos donantenan activo, srta. Nataly Montanes, den compania di e team di Bloedbank a saca e nomber ganado.

E feliz ganado di e bicicleta di Bloedbank a keda den persona di Ingmar Ramharakh cu a bisa cu e ta un donante orguyoso: “Mi a yega aki y mira e bicicleta y mi a puntra con mi por haya e bicicleta aki. Nan a splica mi cu bo ta haya ticket pa busca hende. Mi a bay bek trabao cu un cantidad di ticket y a parti esaki bou di mi coleganan. Mi a pidi nan pa hiba e ticket y duna esaki na Bloedbank y asina mi a logra gana e bicicleta.”

 

Pa medio di e campaña aki nos di Bloedbank tabatin como meta pa recluta mas “Lifesavers”.

E campaña a cosecha hopi reaccion riba medionan social. Ta di recorda hende con e la cuminsa pa medio di posters colga rond di Aruba cu nomber di un donante activo cu ta un “Lifesaver”. Esaki a crea den tur caso un “buzz” y un hype riba medionan social cu testimonio di diferente “Lifesavers”y pues hopi persona a reacciona y a inscribi pa bira donante.

 

Bo tambe kier bira donante? Yama 587 0002 of yena e formulario riba www.bloedbankaruba.org. Of check nos pagina riba Facebook.

 

Masha pabien Ingmar cu bo bicicleta nobo y alabes danki na un y tur cua haci di e campaña aki uno exitoso.

Top