Inscripcion ta habri pa e di 11 speurtocht “Conoce nos mondi”

Diasabra 22 di april 2017, riba peticion di diferente amante di speurtocht lo tene e di 11 speurtocht “Conoce nos mondi”.

Meta ta pa trece gruponan di famia, colega y amigonan hunto y participa den un caminata cu pregunta den mondi den un actividad hopi sano, recreativo y relahante.

Alabes motiva hende pa cuida nos naturalesa y siña algo mas di dj’e. E ruta di e aña aki ta un combinacion di mondi, caminda di santo y caminda di asfalt.

 

Inscripcion ta habri y por WhatsApp na 5928170 of manda un e- mail na conocenosmondi@hotmail.com of bay riba Facebook “Conoce nos mondi” pa ricibi un formulario di inscripcion cu mester wordo yena y manda bek.

Tambe por djis inscribi via e-mail mandando e nomber di grupo, un number di telefoon y nomber di e participantenan.

 

Tur grupo interesa ta bon bini. E grupo preferibel te 10 persona, aunke lo tuma grupo mas grandi tambe. Ta cuminsa 4’or di atardi y esun cu yega prome ta sali prome.

Ningun grupo por sali mas laat cu 5’or teniendo na cuenta cu tur grupo mester ta paden pa 7’or. Lo sali y termina na Jan Flemming 16-A y lo cubri un distancia di aproximadamente 4 kilometer. Tin trofeo pa grupo cu termina na e prome tres luganan, tambe lo tin premio special.

 

Pa mas informacion por tuma contacto libremente. Inscripcion ta Afl. 7,50 pa persona.  Mescos cu tur caminata lo tin un waterpost y na final lo ricibi algo di bebe y patia.

Ta recomenda tur esunnan cu kier participa pa cuminsa forma nan grupo, duna esaki un nomber. No ta bay ta posibel pa inscribi na cuminsamento. Ultimo dia pa inscribi ta diabierna 21 di april, 2017.

Top