InselAir MD bek den operacion cu buelonan comercial

WILLEMSTAD – Diaranzon 11 di october 2017, InselAir den colaboracion cu autoridadnan di Aviacion Civil Corsou a cumpli cu tur e rekisitonan di ley pa por a certificá e avion MD (MDI). E buelo di aceptacion cu a wordo haci tabata uno exitoso.

 

Den e ultimo lunanan tras di lomba, InselAir tabata haci su buelonan entre islanan ABC y Sint Maarten cu e avion Fokker 50, cual ta referí n’e scenario “Basico” cu a wordo introducí na comienso di e reorganisacion di InselAir.

Agregando e MD bek n’e flota di InselAir ta un paso importante riba e caminda p’e “Basico Plus”, scenario cu lo yuda fortalecé e situacion financiero y lo completá e plan di stabilisacion di e companía.

 

Den e scenario aki clientenan lo mira cu rutanan anterior lo keda reanuda. P’e motibo aki ta trahando acuerdonan financiero cu e paisnan den región.

InselAir sigur lo sigui continuá cu su plan pa yega n’e scenario caminda lo amplía su rutanan y conectividad den region.

E MD cu su 145 stoel lo opera tur dia riba e ruta entre Corsou y Sint Maarten entrante ayera 12 di october, saliendo for di Corsou 9.15am y lo aterisa na Sint Maarten 10.45am.

E buelo di regreso for di Sint Maarten lo sali 11:45am y lo aterisa na Corsou 1:15pm.

 

InselAir ta gradici e autoridadnan di Aviacion Civil Corsou y tur empleado di InselAir cu a forma parti di e proceso extenso pa por a trece e MD bek den operacion y alabes ta entusiasmá di por cuminsa bek cu e servicio di jet pa nos clientenan riba e ruta di Sint Maarten.

Top