Inspectie Volksgezondheid Aruba (IVA) operando caba

Inspectie Volksgezondheid Aruba (IVA) ta un organo independiente cu a wordo estableci riba 1 di januari 2017.

E meta principal di IVA ta pa controla y stimula mehoracion di e calidad di cuido medico na Aruba na un manera independiente, proactivo, y transparente. Tur ciudadano mester por confia rib’e sistema di cuido medico den un pais y IVA tin e tarea pa percura pa e dunadornan di servicio wanta e nivel di cuido medico cu tin den ley. Pa realisa e meta aki, IVA ta bishita diferente institucion di cuido y dunador di servicio pa wak con nan ta traha y asina duna conseho pa mehoracion unda ta necesario.

 

Cu e introduccion di IVA, e departamento di ‘Juridische Zaken en Inspectietaken’ di Departamento di Salud lo stop di existi. Ademas, ‘Inspectie voor Geneesmiddelen’ (IVG) lo ta un departamento cu awor lo cay bou di IVA y no lo ta un organisacion riba su mes mas. Un departamento crucial di IVA lo ta e meldpunt unda cu e dunadornan di servicio medico por acudi cu kehonan. IVA ta lidera dor di Inspector General señora mr. Dorylee Lopez Penha.

 

Actualmente IVA ta trahando riba su prome sondeo cu ta rib’e topico di medicatieveiligheid. E topico aki ta un di e seis kwaliteitsthema’s cu IVA lo pone atencion riba dj’e den e añanan venidero. IVA a duna preferencia na medicatieveiligheid pa motibo cu e preparacion y prescripcionnan corecto di remedi ta importante pa e pashent y pa e calidad y seguridad di cuido en general. E sondeo aki a dura tres luna durante cual a bishita diferente dokter di cas y botica. E resultadonan di e prome sondeo lo wordo publica den e lunanan venidero.

 

Pa mas informacion, por fabor tuma contacto cu IVA via email: inspectievolksgz.gov@gmail.com.

Top