Integridad den gobernacion ta un preocupacion latente di pueblo

Bon gobernacion, integridad y norma y balor cu comunidad kier mira den un gobernacion bek ta loke ta falta actualmente. Ultimo añanan ta sinti cu tabatin deficiencia p’e aspectonan aki.

“Na diferente ocasion mi a mustra cu un di e motibonan cu mi no ta forma parti mas di e partido cu ta den Gobierno y tampoco ta carga e responsabilidad di Minister den e Gobierno ey, ta netamente p’e aspecto di principio.

Ta trata di asuntonan cu mester tin transparencia y claridad pa comunidad. Cierto momento lider di partido y Minister President di Aruba no por a responde n’esakinan mas na mi persona.

Cual a pone cu mi a tuma decision pa bay Gobernador na januari unda cu a firma un acuerdo den Conseho di Minister riba 9 punto cu mester a mira cambionan tuma lugar.

Lamentablemente esaki no a tuma lugar. Consecuentemente november decision a cay cu mi a bandona e Gobierno cu ta sinta,” segun Otmar Oduber.

 

Abuso di poder y intimidacion di parti Gobierno

Tin hopi acusacion tumando lugar di e abuso di poder cu ta tumando lugar den comunidad, cual ta algo cu nos comunidad kier rechasa y bira lomba p’e y cu nos partido ta para p’e.

Un politica nobo/diferente unda cu no ta lastra hende su nomber manera cu ta tumando lugar directa- of indirectamente dor di e Gobierno.

Hopi t’esnan riba payroll, hopi t’esnan cu como coordinador di Minister ta wordo uza den e aspecto aki.
Awe kier mustra con e nepotismo y politikeria den e Gobierno aki ta tumando lugar caminda cu (djis e siman aki so) hendenan a wordo pidi pa pone bandera na nan cas y pa kita sticker di entre otro partido POR.

Pa motibo di promesanan di Prome Minister na un meneer di riba 70 aña, cu lo dune permiso pa un persona cu a wordo saca ilegal for di Aruba, cu e lo regla esaki p’e.

 

Mescos cu intimidacionnan cu ta tuma lugar na un ambtenaar, caminda cu un Minister cu a bishita ta mustra riba e hecho cu si e no ta hunto cu e Gobierno lo mira ki consecuencia lo tin contra e persona.

Asina tin diferente caso di intimidacion y abuso di poder cu ta tumando lugar cu personanan den comunidad, awor cu ta serca di eleccion, segun denuncia di Otmar Oduber di POR.

Top