Interes grandi den cuminsa un negoshi na Aruba: Business Plaza – Get Started! Evento di KvK hopi bon bishita!

Camara di Comercio y Industria Aruba (KvK) un biaha mas a organisa e evento Business Plaza – Get Started! cu ta enfoca principalmente riba tur hende cu kier cuminsa un negoshi of cu recien ta un empresario. E bishitante a haya e oportunidad pa expande nan conocemento riba diferente topico cu ta importante n’e momento cu bo tin e ambicion di cuminsa un negoshi of ta den e proceso y tin pregunta specifico riba rekisitonan y maneho di bo negoshi.

For di 9’or di mainta e bishitantenan por a atende diferente presentacion cu topiconan hopi interesante. CMB tabata sponsor di e evento Business Plaza – Get Started!

 

E dia a cuminsa cu algun palabra di bon bini di sr. Ernst Mohamed, presidente di KvK. Siguientemente sra. Kimberly Vanschel di CMB a splica kico ta importante ora di habri un cuenta di banco comercial. Pa complementa e topico sra. Sue-Ellen Farro di KvK a elabora den un presentacion con bo ta cuminsa un negoshi y asina dunando tips importante n’e starter.

Sr. Atwell Aniceta, representante di CXPAY na Aruba a comparti cu e publico informacion encuanto e-Commerce y e rol di CXPAY den esaki.

 

Un otro presentacion hopi interesante ta di sr. Marksonn Maduro cu ta forma parti di ‘Monumnt’, e team ganado di e Hackathon Oranjestad. ‘Monumnt’ a conta di nan experiencia y kico tur nan a siña den corto tempo cu nan concepto pa Caya Grandi.

Sr. Oliver Vieira di Qredits a conta rib’e posibilidadnan di financiamento cu Qredits ta brinda.

Sra. Lay Hing de Kort di Cornerstone Economics a duna un workshop yena di conseho valioso tocante con bo ta hinca un bon business plan den otro. E ultimo presentacion di dia a ser duna dor di sra. Maria Dijkhoff-Pita cu a conta kico ta Sustainable Development Goals y nos tur por contribui den esaki.

 

Manera ta custumber durante eventonan di Business Plaza, KvK ta brinda e oportunidad pa tur bishitante haya un consulta di biaha. Diferente bishitante a haci uzo di e oportunidad aki p’asina haci un consulta liber cerca e Business Advisors di KvK y tambe Departamento di Asunto.

Sra. Sonja Velthuizen, Directora di KvK y sr. Dave Martinus di ActionCoach a duna informacion di e programa nobo p’e proximo curso di Empresario Independiente Chikito/Mediano y a brinda e oportunidad pa interesadonan registra n’e curso aki cu ta sigur algo hopi interesante pa cualkier empresario cu ta cuminsando un negoshi.

 

Despues di tur e presentacion a brinda e oportunidad pa tur esnan presente intercambia ideanan y elabora riba topiconan pa fortifica lasonan comercial den un setting ameno combina cu bebida y aperitivos.

 

Durante e evento aki tambe a lansa e revista Entrepreneur Aruba. Asina tambe tur esnan presente por a ricibi un copia gratis y expande ainda mas nan conocemento rib’e mundo di empresaria cu ta enfoca riba Aruba. E revista aki ta obtenibel gratis cerca KvK y lo ta disponibel cada 3 luna cu un edicion nobo brindando informacion al caso riba diferente topico di interes p’e comerciante local.

Un danki ta bay na tur cu a contribui pa haci e evento Business Plaza – Get started! un biaha mas un gran exito. Un danki tambe ta bay n’e sponsor principal: CMB.

 

Proximo edicion di Business Plaza lo tuma luga januari 2018 y ta e edicion ‘Step Forward!’ dedica na empresarionan existente cu kier expande nan negoshi.

Pa mas informacion tocante Business Plaza, curso Empresario Independiente Chikito/Mediano y otro servicio di KvK, por tuma contacto na 582-1566, ext. 42/35/27/30 of manda un e-mail pa: businessinfo@arubachamber.com.

Top