Invitacion pa firma di buki ‘Cicatriz di Mirada’ scirbi pa autora hoben Angelle Stamper na Van Dorp

Diasabra awor, dia 4 di februari 2017, Angelle Stamper lo ta presente na Van Dorp Dakota di 11or di mainta pa 1or di merdia pa firma su buki: ‘Cicatriz di Mirada’ y ta invita un y tur cu ta desea ainda un copia y firma di su buki pa pasa.

Algun luna pasa Angelle a lanza ‘Cicatriz di Mirada’ desde Hulanda. Na cuminsamento di e aña aki tabatin e presentacion oficial di e buki.

E anochi tabata un anochi bunita cu a cay na agrado di e publico presente, unda Angelle a presenta varios poema di su buki y a termina cu bautismo di e buki cu petalos di rosa.

 

Osvaldo Correa a compañ’e durante tres poema. Su primo chikito Liam Kock, tambe a recita dos poema.

E presentacion a tuma lugar na Renaissance Marketplace den aire liber.

‘Cicatriz di Mirada’ ta un album di poesia conteniendo poema na Papiamento, Ingles, & Hulandes acompaña pa potretnan saca na Aruba pa Angelle su mes persona.

Comentarionan cu Angelle a ricibi tocante e buki ta cu e poemanan ta hopi profundo y diferente, pero tambe cu e buki ta agradabel pa lesa.

 

‘Cicatriz di Mirada’ ta abarca un periodo di 10 aña cu Angelle ta activo den mundo literario y mundo di fotografia.

E titulo ‘Cicatriz di Mirada’ ta refleha e hecho cu experiencianan den bida ta laga marcanan atras, of mihor bisa cicatriznan, den e manera cu un persona ta mira e.o. bida, amor, mundo, y nan relacion cu diferente persona.

Cada persona tin su propio cicatriznan cu e ta acumula di e prome te n’e ultimo rosea. E mensahe prinicipal cu Angelle kier comparti pa medio di Cicatriz di Mirada ta scirbi den e prome frase den e buki, cual ta bisa: Lagrima cu cay lo seca prome cu toca suela.

 

Angelle a haci diferente entrevista tocante su buki e.o. dor di Bookish Plaza, Chaerloo Agency, Biblioteca Nacional Aruba, TeleAruba, Top FM, Power FM y Hit FM. Tambe a presenta algun poema n’e celebracion di e di 4 aniversario di Dutch Caribbean Book Club den Theater De Vaillant na Den Haag, Hulanda den november aña pasa.

Siman pasa Angelle a presenta algun poema n’e Poetry Night Star Gazer di Basha Foundation na Sero Colorado Light House.

Riba Celebracion di Dia di Betico ultimo Angelle tambe tabata presente cu su bukinan na Plaza Betico.

 

Den pasado Angelle a declama poesia na diferente evento cultural, exposicion di arte y actividad formal tanto na Aruba y den exterior. Angelle a participa diferente biaha n’e compentencia literario “Arte di Palabra” na Aruba y na Corsou.

Na diferente ocasion a bay cu premio di prome y segundo lugar pa su poemanan “Garnachi di Speransa” y “Bo no mag di bay”.

Na 2011 Angelle tabata un di e 25 hobennan cu haya reconocemento en conexion cu celebracion di 25 aña di Status Aparte, pa medio di exposicion Aruba Dushi Tera “Chikito y simpel bo por ta pero si respeta”.

E mesun aña Angelle a presenta su poema “Freedom within” na desvelo di estatua di Anne Frank den Wilhelmina Park. ‘Cicatriz di Mirada’ ta un proyecto financia pa UNOCA Aruba.

 

Pueblo di Aruba di keda invita pa bin topa cu Angelle Stamper diasabra awor na Van Dorp Dakota pa adkiri y/of laga firma nan copia di ‘Cicatriz di Mirada’.

Pa mas informacion por tuma contacto via 662-4003 of por manda un email na cicatrizdimirada@gmail.com.

Top