Jaap Ellis di ATA Europa: Aruba ta logrando bon resultado den Mercado Europeo

Diabierna ultimo, Prome Minister Mike Eman tabatin un reunion importante cu compania di aviacion Hulandes KLM. Den cuadro di esaki, e mandatario a tene un encuentro informativo tambe cu ATA-Europe, cu tin su oficina na Den Haag.

 

Jaap Ellis, Sales & Marketing Manager na ATA-Europe, a reuni cu Prome Minister Eman y a duna informacion riba e resultadonan positivo cu e Mercado Europeo tin pa Aruba y hasta e ta kere cu por yega na amplia e cantidad di asientonan cu tin disponibel awor riba TUI y KLM.

A papia riba resultadonan di 2016, e meta poni pa 2017 y naturalmente e situacion di InselAir.

 

Pa loke t’e mercado Hulandes, esaki ta hopi positivo pa Aruba mirando cu ta canando un 30% dilanti riba e cifranan anterior.

Otro mercadonan manera UK, Suecia, Italia y Alemania ta mustra hopi positivo. Tur esaki ta cifranan positivo cu KLM tambe ta mira, segun Ellis.

Awor cu e situacion cu a surgi na Turkia tin un cambio den e patronchi di biahe di e Europeonan.

 

“E hendenan no ta boek masalmente pa Aruba, pero si por mira un cambio.”

E biaheronan cu normalmente ta reserva pa bay Egipto y Turkia, awor ta biaha pa Francia of Italia.

Di otro banda, esnan cu a biaha p’e paisnan aki caba, ta evaluando un biahe pa Caribe. E grupo aki nos ta trata di atrae pa Aruba,” Ellis a comenta.

ATA Europe tin un strategia nobo pa atrae bishitantenan Europeo. Nan ta scoge pa invita personanan famoso cu tin un grupo grandi di seguido manera Marco Borsato, kende recientemente tabata di bishita na Aruba.

 

“Nos ta yama esaki ‘influence marketing’” y nos ta haci uzo di esaki enbes di un propaganda den un revista manera National Geographic.

E seguidornan cu e hendenan di influencia aki tin ta hopi grandi. Na momento cu nan post algo riba nan Instagram, ta miyones di persona, cu nunca a bishita Aruba, ta mira e potret of comentarionan.”

Den e exito cu Aruba a logra riba Mercado Europeo ta danki n’e bon relacion cu tin cu su socionan manera KLM, Tui y operadornan di tour.

 

Mirando e exito cu Aruba ta ganando den den e mercado aki, e aerolineanan socio di Aruba tin pensa caba pa amplia e cantidad di asiento disponibel, Ellis a informa.

Top