Jacky van Putten di POR: Maneho di deporte mester claridad

“Ta haci 4 luna caba cu mi a profila mi mes como candidato riba lista di e Plataforma E Forsa Nobo, POR cu e intencion di por logra e meta di mehora e deporte y movecion riba nos isla. Manera cualkier politico cu ta haci su mes elegibel pa e pueblo di Aruba, tin mester di e plan, e vision y e forma con lo bay maneha e pais aki”, van Putten ta splica.

 

“Manera bo por lesa tur siman den corant of Facebook nos Plataforma ta masha ocupa cu tende y intercambia ideanan cu diferente instancia local. POR su programa lo ta realistico cu un vision pa Aruba su futuro stabilidad economico, social y seguridad.

Pa deporte tambe nos ta sintando cu diferente persona cu sa y tin deporte na pecho p’asina por ta miho prepara cu un maneho coherente na unda tur ramo di deporte y vooral scolnan, desde kleuter por tin e facilidad y experticio humano p’asina nan por desaroya sanamente y den nan mesun ambiente”, van Putten ta mustra.

 

“E pregunta na mi semper ta kico bo lo bay haci pa deporte, kico ta bo plan, con lo bo bay cambia of unda lo mi lo cuminsa? Trahando den deporte organisa pa 35 aña mi por a wak kico a funciona y kico no a bay bon. Mi por a wak centenares di estudionan, proyectonan pa cu deporte cu algun ehecuta bon, otronan cu a fracasa y algun cu a keda den lachi di director. Deporte, mescos cu educacion mester ta halto riba cualkier programa di partido cu kier wordo elegi dia 22 di september si nos kier purba sanea e sociedad aki y concentra riba mehora nan salud fisico y reduci criminalidad bou di nos hobennan”, van Putten ta enfatisa.

 

“Educacion y deporte ta un forma efectivo cu lo duna su frutanan mañan. Pa formula un programa mester tin un vision unda bo kier yega y con bo kier yega. E ta encera dos aspecto, un e maneho y di dos e finanza. Bo por tin un bon plan di maneho, drecha facilidadnan, traha gymzaalnan nobo, provee mas cancha di bala y centronan di recreacion, prepara nos coachnan y entrenadornan miho, manda busca instructornan di afo pa prepara nos miho, provee material deportivo pa scolnan y barionan y asina un lista largo di logronan cu bo kier yega.

Pero no mester lubida mester placa pa por haci tur esaki.

Bo plan di maneho lo depende principalmente na loke Gobierno y Lotto lo aloca pa deporte.

E prioridad di e Gobierno pa cu deporte lo ta esencial. Nos por wak rond di nos cu masha facilidadnan a wordo financia y placa ta wordo presupuesta pa diferente disciplina di deporte”, van Putten ta agrega.

 

E ta sigui bisa cu, “Ta importante pa cualkier dirigente den futuro prome cu por traha un maneho ta na altura ki placa tin disponibel. Tur dia mi ta wordo confronta cu unda tur e placa ta bay di Lotto y gobierno. Nan no ta mira ningun avance den deporte y cu a cambio a bay drasticamente atras. Citando e palabra di nos Minister di Salud Publico, Cuido di nos Grandinan y Deporte Dr. Schwengle, “mi prome 3 añanan mi a dedica na loke ta mi specialisacion esta medicina” y awor e ta bay dedica tempo na Deporte.”

 

“Nos a ripara enberdad cu esaki tabata e caso. Gobierno anterior ta expresa cu bo por wak unda e placa a bay, tin yen facilidadnan nobo. Gobierno actual ta bisa cu nan a haya un fondo di Lotto den bancarota cu mester a refinancia e debe y contrato cu Canada.

Den mi opinion mester bin claridad den esaki, minister mester habri e bukinan pa tur hende por wak pa nan mes unda of con e placa disponibel pa deporte a wordo y ta wordo gasta.

Nos deportistanan, nos pueblo mester por mira pa nan mes con esaki ta wordo maneha.

Cu e claridad aki di kico tin y kico mester cumpli cu ne bo lo por planea un miho maneho den deporte. Sino e ta keda solamente palabranan riba papel, promesanan bashi y un otro raport cu ta bay den lachi di director”, van Puttan ta conclui.

Top