Jacky van Putten di POR: Profesionalismo den deporte ta importante pa combati criminalidad y obesidad

Jacky van Putten, candidata di Plataforma E Forsa Nobo, POR, ta kere cu pa por tin mas deportista riba nivel di topsport y asina contribui cu combatimento di criminalidad y obesidad, nos mester cuminsa trece bek mas profesionalismo den nos deporte na Aruba.

 

“Na aña 1978 mi a haci e test fisico cu IDEFRE tabata encarga cu ne. E tabata un exigencia pa por drenta estudio di CIOS cu ta un estudio pa deporte na Hulanda.

CIOS ta un estudio di 4 aña riba diferente nivel di deporte unda na final bo por traha na diferente organisacion deportivo, na bombero, polis, prison y tambe bo por specialisa bo mes pa traha cu grupo special e. o. gehandicapte sport, na scol y hasta por gradua den sportmanagement”, según van Putten.

 

“Na 1982, mi a termina mi estudio, mi a regresa Aruba y a haya e oportunidad di drenta den servicio di Gobierno na IDEFRE. Varios otro studiante di Aruba a sigui e estudio aki y esnan cu a regresa tambe a bay traha na IDEFRE.

Tabata traha parti mainta na scolnan (ondersteun e lesnan di gymnastiek), traha cu hende grandi, gruponan special y parti merdia nos tabata den diferente bario dunanando instruccion di deporte.

 

Banda di nos como instructor di CIOS a introduci instruccion di deporte na scolnan basico parti mainta unda e tempo ey IDEFRE a bin cu curso special pa entrenador di deporte pa nan por specialisa y preparanan pa duna lesnan di deporte den orario di e gymlessen na diferente scol basico. Banda di esaki den oranan di merdia e mesun entrenadornan aki tabata encarga cu instruccion di deporte den Centronan di Bario”, van Putten ta splica.

 

“Tambe pa e federacionnan deportivo IDEFRE a bin cu entrenadornan di e. o. Cuba pa sostene, guia y entrena e deportistanan cu nan entrenadornan local.

Trahando 34 aña den deporte mi a traha cu mas o menos 7 Minister cu cada uno cu nan maneho pa cu deporte. Tin Minister a pone den nan maneho prioridad pa cu programa pa nos hobennan y comunidad en general cu e meta di Mas Deporte menos Vicio otro riba construccion di Complehonan Deportivo y lastima cu algun no tabatin deporte na prome luga.

 

Esaki a refleha tambe den e ultimo añanan unda no tabatin programanan deportivo despues di scol y den bario pa nos hobennan cu tur e consecuencia cu awe por lesa den medionan di comunicacion cuanto hoben ta cay den droga y KIA su departamento hubenil tin hopi returns, no papia mes di obesidad cu ta hopi alarmante bou nos hobennan”, van Putten ta continua bisando.

 

“Desde cu mi e regresa di Hulanda mi a keda encarga y coordina e test fisico pa e estudio di CIOS unda 2 a 4 studiante ta bay Hulanda pa sigui nan estudio riba tereno di deporte pa aña, pero na final di nan estudio hopi kier bin bek, pero NO ta haya trabou y ta opta pa keda Hulanda unda si ta haya e oportunidad pa traha den centronan di bario y clubnan deportivo of ta sigui nan estudio riba nivel mas halto.

 

E Plataforma Forsa Nobo, POR tin varios punto pa den su maneho pa cu deporte y esaki ta uno di nan crea cuponan di trabou pa profesionalnan hoben diploma den deporte den diferente area y nivel tanto local y den exterior y duna oportunidad pa bin traha den nos sistema actual p’asina yuda den e paso pa gradualmente profesionalisa nos deporte p’asina nos por trece un solucion pa combati criminalidad y obesidad bou di nos hobennan, y hisa nos nivel di deporte”, van Putten ta termina bisando.

Top