Jacky van Putten di POR ta lamenta vandalismo riba tereno di deporte na veld di Universal

Jacky van Putten di POR a tuma nota riba social media cu dia 22 di februari SV Unistars a encontra cu algun luz di e veld a wordo kibra pa medio di vandalismo y esaki e ta lamenta masha hopi mes.

Manera dirigente di SV Unistars ta menciona den medionan social “Un deportista MAS ta un delincuente MENOS” y esaki bo ta logra sigur cu programanan den bario unda muchanan bou guia di entrenadornan y boluntarionan.

 

“Mi sa cu SV Unistars pa hopi aña tin su team di futbol cu ta train rib’e veld aki y banda di esaki un “looppad” a wordo construi unda parti mainta y atardi laat varios adulto y hoben ta haci uzo di esaki pa mehora y mantene nan salud”, van Putten a splica.

 

“Mirando cu ultimo añanan e bario di Pos Chikito, Sabana Basora y vecendario ta hopi den luz negativo pa problemanan di robo y formacion di gang bou e hobennan cu ta un problema pa nos comunidad mescos pa cu otro barionan cu ta enfrentando e problema aki tambe, mi ta spera cu e Minister actual di Deporte pone urgente atencion pa cu SV Unistars cu ta haci tur su esfuerso pa mantene nan hobennan riba un bon caminda.

Igualmente otro ministerionan y instancianan lo por duna un man pa drecha e luznan aki p’asina nos hobennan por sigui practica nan deporte”, van Putten a continua bisando.

 

“Como candidato riba E Forsa Nobo POR unda deporte ta mi pasion mi tin sigur e sosten di e team completo pa yuda combati criminalidad bou nos hobennan cu e. o. programanan deportivo y recreativo den bario p’asina nos tur por uza e lema: Un deportista MAS ta un delincuente MENOS”, Jacky van Putten a finalisa.

Top