Jacky van Putten (POR): Cancer ta un peso grandi pa famia

Den mi carera profesional mi tambe tabatin e privilegio di por a traha cu damanan cu a wordo afligi p’e malesa di cancer. Trahando cu Mary Joan Foundation como fitness instructor, mi tabatin casi diariamente contacto cu diferente di e damanan aki. Mi por a vangnan op y mira con dificil nan tabata pasa cu nan condicion. Algun biaha pa siman nos tabata bin hunto y apoya otro pa medio di ehercicionan specifico. No tabata facil p’e personanan aki ya cu sacrificionan grandi ta wordo haci tanto emocional, social y financiero, Jacky van Putten ta splica.

 

Mayoria di e personan aki ta pasa tratamentonan severo di kimoterapia y radiacion cu ta hortanan di nan energia y vitalidad. Dia aden, dia afo nan tin cu atende cu dolor y mane cu no ta suficiente, ainda mester cumpli como mama, casa y tur tarea diario na cas y trabou.

60% di personanan cu ta sufri di cancer ta rib’e edad di 60 aña y ta e causa numero dos di mortalidad aki na Aruba y mundo. Cu otro palabra e personan aki ta pasa henter nan bida ta traha y aporta na impuesto, lastimosamente hopi di nan no lo yega e edad pa disfruta di nan pensioen, segun van Putten.

 

Den nos programa di gobernacion a tuma na consideracion e personanan cu a traha henter nan bida trabounan fuerte manera e. o. construccion y hoteleria. Ta brindanan e opcion di traha part time y disfruta di parti di nan pensioen.

  • Lo introduci flexibilidad den e sistema di pensioen di AOV pa duna e ciudadano cu tin por lo menos 60 aña di edad e opcion pa e por:
  • Baha cu pensioen prome cu e cumpli 65 aña cobrando un pensioen reduci;
  • Traha part time te cu 65 aña cobrando un pensioen reduci banda di su salario.

 

E Plataforma E Forsa nobo, POR ta di opinion cu mester di un manera of otro duna apoyo na e famianan aki y purba alivia e peso enorme riba nan lomba. Esaki ta un di e rasonnan cu nos ta kere cu mester duna e oportunidad pa personanan cu ta riba 60 aña (y den e caso aki cu un malesa asina devastador) e posibilidad pa disfruta di nan pensioen adelanta.

Un sistema di flexibilidad di pensioen lo brinda e. o. e personanan aki e oportunidad pa por disfruta parcialmente di nan pensioen bon mereci sin mester di haci sacrificionan inhumano, van Putten ta sigui bisa.

 

Mi no ta kere cu lo tin un politico of partido cu no lo bay di acuerdo pa duna un ayudo asina na nos ciudadano cu merece di dj’e y ta pasando un periodo super dificil.

Ami por a wak e sufrimento aki di famianan afligi, no solamente na trabou pero a bib’e personalmente cu mi mama (d.f.m.) cu tambe tabata un pashent di cancer.

Cu e flexibilidad aki den pensioen nos por den Gobierno duna un apoyo significante p’asina e dianan cu Dios permitinan por pas’e hunto cu nan sernan keri y no mester pensa con nan ta bay cumpli cu tur nan debernan financiero, Jacky van Putten ta conclui.

Top