Jacky van Putten (POR): Cultura di Miedo den deporte

Drenta politica no ta nada facil, bo lo bira blanco di ataque di tur personanan cu ta pensa pasobra bo a tuma e desiciona aki nan tin e derecho di comenta sea bon of malo di bo persona. Nos cultura, nos politiconan, nos fanaticonan, nos sustenedornan lo vocifera kico nan ta pensa y bo mester por cu esaki, según Jacky van Putten.

 

Pa e motibo aki hopi intelectual, personanan cu e capacidad ta preferea di astene di politica pa asina nan bida personal of laboral no wordo afecta. Mi ta compronde cu esaki ta algo “normal” pa politica pero loke mi a bin ta compronde cu esaki no ta unicamente den politica, e mesun “cultura di miedo “tambe tin su luga den deporte.

 

Papiando cu diferente deportista, entrenadornan y miembronan di directiva di organisacionnan deportivo p’asina por tin un miho conocemento di kico ta biba eyfo mi a keda tristemente sorprendi con cauteloso nan ta ora di expresa pa mayan nan no wordo sentencia.

E desapunto, e frustracion y incapacidad di por haci algo ta y a laga hopi deportista disiluciona. Tur dia mi ta haya yamadanan y invitacion pa papia cu diferente deportistan, pero nan kier keda anonimo pa mayan nan no tuma represalia contra nan, nan yiu of nan organisacion. Ciego no tin den deporte, pero pa expresa nan descontento si tin temor, van Putten ta mustra.

 

Comunicacion entre e deportista, e mayor, e bond cu e federacion ta un di nan precupacion cardinal. Nan no sa of no ta mira con e financia deportivo ta wordo maneha.

Tin clubnan cu masha poco atleta, pero net nan ta haya mas placa di subsidio. Otronan cu ta conta cu hopi atleta ta wordo corta den nan presupuesto. Aunke ta wordo bisa cu tin transparencia y tur tin e mesun derecho den practica, nos tur sa cu no ta asina.

 

Mescos cu politica, ta cu ken bo ta cana y ken bo conoce ta loke ta define e aporte cu bo lo haya. Deporte a sufri dor di esaki. Ta tempo pa nos bin hunto y expresa nos precupacion real y asina trece un transparencia den e maneho di deporte na unda ta kita e poder di decision for di man nan di un of dos persona.

No mag y no por tin miedo di represalia cu lo por perhudica bo deporte, mester por tin e libertad di opinion p’asina nos por un biaha mas engrandece nos deporte aki na Aruba y na unda e fondonan desponble por wordo reparti igualmente mirando e organisacion su maneho y concentra unda realmente nan mester mas sosten, Jacky van Putten a duna di conoce.

Top