Jacky van Putten (POR): Importancia di participacion di hende muhe den deporte

Dia 8 di maart ta Dia Internacional di Hende Muhe unda mundo completo ta celebra y reconoce importancia di ser femenino den nos comunidad y mi kier a pone atencion rib’e topico, “Participacion di hende muhe den deporte”.

 

“Den mi añanan di experiencia den mundo di deporte mi a wak cu entre participacion di nos hende muhe cu homber cu den diferente etapa di bida mas hende muhe pa un of otro motivo ta stop di pratica deporte of haci movecion.

Cuanto biaha nos a tende comentario wordo duna, “Mucha muhe no mester practica un deporte specifico” of ora di weganan di team di mucha muhe cu tribuna mita bashi, medionan di prensa  no ta duna mesun atention pa muhe den deporte cu esnan di homber.

Ki impacto esaki tin riba nos mucha muhernan cu ta desea di pratica deporte? Awendia 7 di cada 10 mucha muhe ta sinti cu nan no ta forma parti di e deporte pa motibo cu nan no ta haya e debido atention”, segun van Putten.

 

“Esaki ta un di e puntonan cu un ser femenino ta stop di pratica deporte, pero tambe ora yega den etapa di adolecencia varios mucha dor e cambio di nan curpa hopi biaha nan no sa con pa deal cu esaki, nan no ta sigur di nan mes cu e consecuencia cu nan ta stop di pratica deporte.

Pero netamente pa medio di pratica deporte ta stimula confidencia den un persona.

Otro punto cu tin un influencia den un ser femenino pa stop di pratica deporte ta den e etapa di 20 – 49 aña unda ser femenino ta forma famia (ta bira mama) y tambe ta forma parti di comunidad laboral.

Mas hende muhe cu tin baby, peuter of tin yiu na cas compara cu hende muhe sin yiu cu mesun edad ta stop di pratica deporte den e fase aki”, van Putten ta splica.

 

Pratica deporte tin hopi beneficio importante pa hende muher

Suavisa PMS y dolor di menstruacion: Pratica deporte regularmente ta baha e dolor di menstruacion esaki ta sosode dor cu e substancia endorfine ta wordo produci y esaki ta suavisa e dolor. Endorfine tin un efecto di calmante tambe den e ultimo fase di bo ciclo di menstruacion bo ta kima mas vet.

Suavisa bo fase transitorio di menopausa:            Varios estudio ta mustra cu ta hopi importante pa hende muhe sigui move of haci deporte den e fase transitorio di menopausa pa suavisa kehonan manera e. o. soda anochi, problema cu drumi y iritacion.

Otro beneficionan fisico ta: Mehora flexibilidad y coordinacion, controla presion di sanger, controla bo peso, controla colesterol y mengua e riesgo di osteoporosis.

Tambe movecion ta trece beneficio psicologico: Aumenta e siguransa den bo mes, sali for di aislamento social, reduci depresion, alivia stress y mehora e capacidad di concentracion.

 

Jacky van Putten, candidato di Plataforma Nobo POR, ta haya hopi importante pa diferente instancia e. o. departamento di Gobierno encarga cu deporte, Comitee Olimpico cu tin un comision di hende muhe y Aruba Sport Unie traha hunto pa evita cu nos mucha muhenan hoben ta “drop out” di deporte cu tur e consecuencia cu esaki por trece pa nos comunidad e. o. embraso hubenil, obesidad y criminalidad.

E Plataforma Nobo POR ta desea tur ser femenino un feliz Dia Internacional di Hende Muhe y cu practica di deporte beneficia cada un di boso den boso bida priva y social.

Top