Jacky van Putten (POR): It is what it is: San Nicolas

“Awe nos tin un San Nicolas cu a wordo forma y maneha dor di dos diferente Gobierno desde 1986. Nos infrastuctura y economia a wordo determina dor di maneho integral di partidonan geel y berde. Awe e ta loke e ta danki na e diferente signatura di Gobiernonan.

Si awe bo sali cu bo famia y dal un rond na Aruba bo lo ripara con nos isla a desaroya na Noord, Paradera, Piedra Plat y Santa Cruz a conoce un mehoracion remarcabel den infrastuctura y economia”, segun Jacky van Putten.

 

“Representatenan den Gobierno cu ta di e areanan ey a percura cu nan districtonan a haya e debido atencion y adelanto na unda e bario completo a probecha. San Nicolas na su turno tambe a haya e atencion di nos representantenan y e ta loke e ta awo.

E plataforma politico E Forsa Nobo tambe ta reconoce e importancia di San Nicolas y su desaroyo. Un districto cu diversidad di cultura, imigrantenan di tur isla di Caribe cu a bin duna nos un ayudo economico y a concentra den e area industrial.

Un sociedad unico na unda e forsa semper tabata den e raiznan comun y cultura colorido”, van Putten ta splica.

 

“E plataforma pa e motibo aki ta pone masha halto riba nan programacion di maneho e continuidad den e desaroyo den e area aki y a concentra riba atrae candidatonan cu tin un curason y amor pa mira un desaroyo positivo y continuo na San Nicolas.

Canditatonan cu a crece y core den e cayanan di San Nicolas y sa e importancia di nan bario cu ta Curtis Fraser, Alan Howell, Rose-Ann Didder y mi persona Jacky Ponson van Putten a tuma e reto pa representa nos pueblo en general y specificamente pa percura cu e atencion debido lo wordo duna na San Nicolas”, e miembro di POR a mustra.

 

“Nos lo para pa un desaroyo duradero cu lo beneficia tur habitante di San Nicolas. E “cultural heritage city” mester continua. Deporte mester bira un prioridad atrobe, educacion y cultura/musica mester bira esencial. Mester atrae comercio cu insentivonan atractivo p’asina por tin un shift den e centro di financia di Aruba.

POR tin e capacidad y mas cu tur e boluntad p’asina mira un miho Aruba y un San Nicolas progresivo”, ta locual Jacky van Putten a duna di conoce.

Top