Jacky van Putten (POR): Mas deporte, menos vicio

Jacky van Putten candidata di Plataforma E Forsa Nobo, POR, ta comenta cu su defunto tata a uza mas cu 30 aña pasa un lema di campaña pa enfatisa con importante deporte ta pa cu desaroyo social: “Mas deporte, menos vicio”.

 

Recientemente, e Presidente di Asociacion Bancario di Aruba tambe a bati alarma y expresa nan precupacion pa cu criminalidad riba Aruba. Nan punto di bista ta cu si e economia no ta bon, e ta stimula criminalidad. Mester tin programanan social y educativo apropia p’asina nos hubentud no cay den mal caminda. Trahando cu deporte tur dia pa e ultimo 34 aña mi por a experencia esaki, segun van Putten.

 

Ultimamente nos por wak cu nos hubentud mas y mas ta wordo involucra den criminalidad, droga y alcohol. Varios di nos scol- y barionan droga a haci su entrada y por mira cu tin resultadonan di scol cu ta laga hopi di desea. Nos ta midi tur aña cuanto a slag y cuanto a keda sinta pero no tin ningun estadistica di tur esnan cu no ta yega mes pa haci examen, pasobra nan ya a laga scol caba (drop outs). Nan ta perde den nos sistema di educacion y ta haya nan mes ta bringa den un mercado di trabou limita pa sobrebibi of bay dilanti.

 

P’e motibo aki mi a uni mi mes cu e Plataforma E Forsa NOBO y asina por aporta na trece un cambio positivo den esaki. E cambio na unda ami por ta den deporte. Mi a mira con deporte añanan pasa tabata un forsa grandi pa wanta muchanan ocupa y fo’i caya.

Scolnan tabata haya tur nan material deportivo pa nan programa di deporte escolar y guia dor di Gobierno cual tabata yuda cu nos criminalidad tabata bastante abou entre nos hubentud.

Mi compromiso lo ta pa trece deporte bek den e barionan, unda nos hubentud despues di scol por haya e oportunidad di eherce un actividad social y deportivo, van Putten ta splica.

 

Gobierno mester inverti den su hendenan, mester inverti den profesionalnan cu por carga e proyectonan aki den bario y ademas uza e facilidadnan cu ya t’ey y pone nan den un uzo optimal pa nos barionan. Lotto y Gobierno mester aloca e placa pa paga e gastonan aki.

Ta bunita cu nos ta biaha rond mundo, pero nos sociedad ta muriendo pa falta di atencion pa nos hubentud. Si nos ta serio den combati criminalidad bou nos hubentud nos mester por inverti den nan. Nos tin yen di entrenadornan Arubiano cu por wordo guia y poni den e programanan aki, van Putten ta enfatisa.

 

Djis pa duna un ehempel si nos solamente reduci cu 50% e personanan cu ta ter beschikking na e Ministernan, nos lo tin suficiente placa pa paga pa e programanan aki cu lo beneficia nos tur. Asina ta no bisa cu no tin placa, loke a falta ta boluntad y un maneho deportivo den e Gobierno actual. Si nos kier mira menos vicio y criminalidad anto ban trece deporte bek unda e mester ta den nos bario, nos scolnan y bou nos hubentud, van Putten ta conclui.

Top