E’n sa ni mes cu ta Jardim a denuncié….. Jamaloodin ta pretendé awor cu e ta inocente!!

WILLEMSTAD – Un situacion sumamente curioso y insólito a crea rònd di persona di e sospechoso fugitivo cu husticia Jorge Jamaloodin na momento cu el a circulá un carta caminda e ta proclamá su inocencia di tur loke Ministerio Publico ta buské pa interogá.

Aunke e corant aki no a haña e carta cu supuestamente el a manda, pero cu a keda redactá y concipiá entre dos bufete di abogado na Corsou diasabra ultimo confirmando e tendencia di bati Ministerio Publico na tur ocasion, na final tur hende por tuma nota cu e argumentonan cu nan a usa ta foto y insólito.

 

A anunciá cu a hiba Gobierno di Corsou dilanti Corte di Derechonan Humano Europeo, pero esey ta un mentira flagrante, pasobra pa por aceptá un caso asina, e demandante mester a pasa tur e trapinan di apelacion legal cu ta conta den Reino.

Y e no a haña ni sentencia den promé instancia te p’e bay apelacion te p’e bay Corte Supremo di kico cu ta.

Pa cuminsa, e detencion di Jorge òf George Jamaloodin tin di haber cu keho cu José Jardim a entregá contra dje tempo cu e tabata hefe di Jardim na Ministerio di Finansa.

Naturalmente nan ta interesá pa tende Jorge riba su envolvimentu cu e caso Biento y Maximus,  pero e keho mes-mes ta riba e caso di Fundacion Divi Divi den Steenrijk cu ta fortalesa di famia dos Santos.

 

E argumento cu Ministerio Publico a saca comunicado riba e dos casonan aki ta, pasobra den nan seno consientemente nan kier haci MFK daño. Supuestamente.

Ta obvio cu Ministerio Publico ta cometé eror y cu Procurador General Guus Schram kende ta den laga cay tambe a faya por ehempel den e caso contra Emsley Tromp caminda el a anunciá un par di biaha caba cu e caso ta cla pa bay Corte, pero aparentemente t’e caminda pa Corte e no por haña.

 

Segun e abogadonan di Jorge, Guus Schram y Fiscalnan Hulandes ta mal informá comunidad di Còrsou riba caso aresto George Jamaloodin, pasobra documentonan for di Venezuela ta confirmá esaki.

De paso nan ta mescla screening tambe den e asunto aki den sentido cu Guus Schram lo ta strobando proceso di screening di e Gobièrno nobo sostene pa 12 asiento p’asina por a haña Minister Martina di PNP firma documentonan pa yuda den e show político cu Ministerio Público ta participando den dje pa haci daño político via di Jamaloodin na grupo di 12 asiento.

 

E abogadonan di Jorge a denunciá cu Ministerio Publico ta di mala fe, nan ta practicá abuso di poder y no ta ‘deportivo’ (sic!!).

Fo’i sèptèmber aña pasá Fiscal mr. J. Beliën a manda bisa abogado Wilsoe kende nan kier interogá Jorge en relacion cu tres investigacion cu ta andando.

Luna pasá abogado di Jorge a manda bisa cu Jorge mester keda den exterior mas tanto cu el a spera, pero cu e ta disponibel pa nan papia cune via SKYPE!!!

E Fiscal a manda bisa abogado Wilsoe masha danki, pero e no sa kico e tin cu papia via Skype cu Jorge y cu e mester papia personalmente cune y no via tercernan na Venezuela.

Abogado Wilsoe a conclui cu Ministerio Publico no tabata interesá pa interogá den Jorge, pasobra nan no a pidi Venezuela asisti nan pa mande Corsou.

 

Sinembargo den e caso aki no ta Venezuela sino Interpol tabatin e peticion pa localisá Jorge y regla su transporte pa Corsou.

Wilsoe ta haña cu Ministerio Publico no ta deportivo, pasobra ta ora nan a tende cu e kier keha nan internacionalmente nan a tuma vengansa.

E redaccion di e carta ta poco infantil y e argumentonan ta dòrná cu poco fantasia y folklore y ta conclui cu Jamaloodin no ta laga ningun hende spanté y lo usa tur medio na su alcance pa proba su inocencia!

 

 

Top