JANI BROKKE MEMORIAL ta start sali

E siman aki tur e deportenan cu ta participa den Jan Brokke memorial ta start sali.

Manera tur aña Directiva di Fundacion Movemiento ta Bida (FMTB) ta organisa e torneo deportivo pa tur esnan cu tin 60 aña of mas. Manera aña pasa FMTB atrobe e aña aki a haya ayudo financiero di parti Subsidie Comissie di Lotto pa Deporte pa cual nos ta sumamente agradicido. Na e manera aki nos 60 plusnan por tin un evento deportivo grandi atrobe.

 

Un total di ocho ramo di deporte lo worde practica durante e dianan ey y entregamento di premio e aña aki lo ta dia 16 di september durante un anochi ameno di 8:00pm pa 1:00am unda tur hende por los pia cu bon musica manera semper di J-Formation.

Esaki lo tuma lugar na Club Cage den King Plaza riba Sasaki.

 

Softbal a cuminsa caba rib’e tereno di Aruba Jrs. y lo hunga varios weekend sigi unda mescos cu aña pasa lo tin bataya fuerte entre e teamnan participante.

Volleyball ainda tin lugar pa tur esnan cu kier hunga cu of sin team. Volleyball lo worde hunga den Sporthal na Santa Cruz diahuebs 14 di september pa 7’or di anochi.

Tuma contacto cu Rudy Leysner na tel: 5942546.

 

Tambe pa atletismo, cual lo tuma lugar 16 di september pa 7’or di mainta cuminsando na Palm Beach (cana y core), por tuma contacto cu Rudy Leysner cu ta encarga cu esaki.

E aña aki atrobe Jose Geerman a tuma e timon pa organisa biljard. E aña aki e lo wordo hunga na J&J Snack na Noord. Dianan 9 y 10 di september lo worde hunga cuminsando pa 3’or.

Si abo tambe kier participa ainda cu biljard anto yama Jose na tel: 7482122.
Pa bowling manera tur aña Edna Maduro lo bay organisa esaki y lo wordo hunga riba canchanan di Eagle Bowling. E weganan lo tuma lugardianan 8 y 10 di september.

Si abo kier purba bo suerte cu e caballeronan y damanan 60 den bowling anto yama Edna na tel. 5942433. Domino ta completamente yen caba ya cu Roy Sneek for maart caba a cuminsa prepara su schedule cu e aña aki atrobe lo ta na Centro di Bario Noord.

 

Dia 30 di augustus e reunion di domino na Centro di Bario Noord a tuma lugar. Nos amigo Roy ta puntra tur hungador pa ta presente 30 minuut prome cu wega y tene cuenta cos lo wordo hunga dianan 7 y 10 di september.

Pa mas informacion tocante e diferente weganan por yama oficina di FMTB na tel: 5868651.

Tennis e aña aki lo tuma lugar rib’e canchanan di Gold Coast ariba dianan 13 y 14 di september cuminsanda pa 7’or di anochi.

 

Directiva di Fundacion Movemiento ta Bida kier a gradici e aña aki atrobe tur esnan cu ta yuda nos gratuitamente pa organisa e torneo grandi aki cu ta esun di mas grandi na Aruba.

Tur hende ta wordo invita di awor caba pa bin presencia nos 60 plusnan den accion.

Leave a Reply

Top