Jennifer Arends-Reyes (AVP) riba tema educacion Proximo Gobierno ta bay promove “Nos Atardi” y elimina fenomeno di “keda sinta”

Papiando rib’e tema di Educacion y loke ta para den e Programa di Partido AVP, Jennifer Arends-Reyes, candidata no. 10, den un conferencia di prensa a bisa cu tin varios punto den Enseñansa cu e proximo Gobierno di AVP lo bay atende. Pero e dosnan cu e ta haya masha importante pa menciona ta promocion di uzo di Nos Atardi y elimina e fenomeno di “keda sinta”.

 

Den e programa di partido, seccion Educacion, ta menciona cinco aspecto cu lo mester resalta den e proximo Gobernacion di AVP. Esakinan ta: Stimula uzo di tecnologia den scol; Mehora cooperacion entre docente-mayor-studiante; Crea mas facultad na Universidad; Introduci mas scol pa muchanan cu necesidad special. e) Elimina e sistema di “keda sinta”.

 

Den econferencia di prensa, cu a tuma luga dilanti Prinses Amalia Basisschool, e Parlamentario y candidata di AVP a bisa cu tin hopi edificio, no solamente den Enseñansa, cu a pasa den un renobacion. No solamente edificio, pero tambe tin programa den enseñansa cu a wordo implementa. Pa pueblo por dicidi cu AVP mester sigui den Gobierno pa por tin continuacion di tur e cambionan, el a bisa cu AVP tin un Programa di Partido cu ta ofrece hopi mas na e sector aki una bes cu bolbe den Gobierno.

 

El a bisa cu tin un base cu a wordo poni caba, y awor den e siguiente Gobernacion mester bay sigui cu e proyectonan.

“Enseñansa ta algo integral y no solamente e ministerio di Enseñansa mester traha hunto, pero cu diferente otro Ministerio tambe. Banda di esaki tin diferente otro Proyecto manera siguridad na scolnan, come saludabel, e parti di deporte cu ta importante”, Parlamentario Arends-Reyes a expresa.

 

Ademas di e puntonan indica, el a menciona tambe e programanan despues di scol cu ta hunga un rol importante den Educacion. Esakinan ta iniciativanan di Gobernacion di Gabinete Mike Eman I y II y ta papia aki di Trai Merdia, cu ta pa scol basico y Nos Atardi cu ta pa studiantenan di scolnan secundario.

“Den e siguiente programa di Gobernacion e lo ta un parti escencial pa sigui traha rib’e parti di merdia, unda cu ta ofrece actividadnan extra curicular manera arte, baile, deporte y musica”, e Parlamentario a splica.

 

Ademas di e ariba menciona, internamente AVP den Gobierno kier bay traha den e cooperacion / laso entre mayor – studiante y scol.

“E tresnan aki ta forma e base pa e studiante, mucha of hoben, por ta exitoso den su carera escolar. Tambe ta bay introduci mas scol cu ta brinda e servicio special na muchanan cu un of otro discapacidad di siña. Y no por lubida un di e puntonan cu a papia hopi di dje tanto den Parlamento como den prensa, ta un cambio den e Sistema di keda sinta. Poco-poco ta bay introduci un sistema nobo cu a largo plaso lo elimina keda sinta. A pensa riba un “summer school” pa evita cu un mucha no mester perde henter un aña di nan desaroyo escolar”, Parlamentario Arends-Reyes a conclui.

Top