Jessica Goldman Srebnick di Goldman Properties: Un Gobierno cu ta pusha pa desaroyo y inovacion ta un oportunidad excepcionalmente extraordinario

E CEO di Goldman Properties a confesa di ta impresiona pa loke el a mira e siman aki canando den cayanan di centro di Oranjestad, pero e ta mas impresiona ainda p’e esfuerso y determinacion di Aruba su hefe di Gobierno pa revitalisa nos ciudad capital.

“Tin un Gobierno di bo banda y pushando pa desaroyo y pushando pa inovacion; buscando rond mundo ken ta haciendo esey bon y con por siña for di e experiencianan, ami ta kere ta un oportunidad excepcionalmente extraordinario p’e isla aki, pasobra e no ta sosode hopi biaha.”

 

Jessica Goldman Srebnick ta di dos generacion na mando di Goldman Properties, un compania priva cu ya pa casi 50 aña ta revitalisa barionan cu a bay atras y ta converti nan destinacionnan exitoso na nivel global.

Den decada 70, nan a duna un bida nobo n’e area di Soho na New York y den decada 80 a percura p’e renacemento di Miami Beach.

Nan logro mas reciente ta districto Wynnwood, tambe na Miami; famoso pa su caracteristica artistico y cultural.

 

Goldman a conta cu nan tin un relacion maraviyoso cu Prome Minister Mike Eman for di tempo cu e mandatario a bishita Wynnwood algun aña atras.

Eman t’asina inspira cu a pidi nan pa bishita Aruba y traha hunto cu e ekipo di Oficina di Inovacion tanto riba centro di Oranjestad, como tambe San Nicolas.

Diarazon mainta a haci un recorido for di Socotoro pa Waf y for di Rancho pa Lagoen.

“Nos ta wowo habri p’e oportunidadnan cu tin y por tin y con nos por inspira otronan, hendenan di negoshi cu kier desaroya aki y inverti aki,” asina e CEO a bisa.

 

Ora cu un bario ta bay atras, edificionan ta cay den otro y hende no ta sinti bon di biba eynan; semper tin resistencia pa haci algo.

E sosten di Gobierno di un bario, ciudad of pais ta cardinal, pasobra e ta duna bo un bentaha. “No ta un proceso facil pa cambia un bario; e ta rekeri hopi creatividad, hopi pensamento inovativo y empresarial y tin un Prome Minister cu ta interesa den esey, ta un regalo,” asina Goldman a finalisa bisando.

 

Despues di e bishita, recorido, sesion di idea cu Gobierno y tambe presentacion na miembronan di sector bancario y comercial, Goldman y su compania ta keda traha estrechamente cu Oficina di Inovacion bou direccion di Ministerio di Asunto General, Inovacion, Ciencia y Desaroyo Duradero.

Lo keda traha riba inversionistanan interesa, facilitacion di financiamento, sosten di conocemento, etc. pa logra revitalisa Oranjestad ainda mas.

 

 

Top