Joanne Balentien-Nicastia CFO nobo di WEB-Bonaire

KRALENDIJK – Entrante promé di janüari 2017 a nombra Joanne Balentien-Nicastia como Chief Financial Officer (CFO).

Hunto cu Alfredo Koolman (CEO) e ta forma e Gerencia di dos persona di WEB. E nombramento ta resultado di un procedura di reclutacion y seleccion cu a cuminsá na jüni 2016.

Joanne Balentien-Nicastia tin mas cu 15 aña di experencia den análisis y implementacion stratégico, y den análisis di riesgo y financiamento di proyecto.

 

Promé cu el a asumí e funcion di CFO, e tabata director y doño di DCConsultancy, cu ta ofrecé servicio financiero comercial.

Te cu promé di jüni 2015, e tabata ‘Senior Directeur Transacties’ na National Investment Bank (NIBANC) na Còrsou.

Den e 7 añanan cu Joanne a ocupá e funcion aki, e tabata enbolbí cu diferente (proyecto di) financiamentu grandi, bao di cua tambe di companianan di utilidad na Aruba, Còrsou, Bonaire y St. Maarten.

 

Joanne a gradua como Master den Ingenieria na Universidat di Twente y a logra tambe nivel 1 como Certified Financial Analyst (CFA).

Promé cu el a muda pa Caribe, el a traha na Hulanda pa KPN. Aya e tabata guia procesonan stratégico, scirbi plan di negoshi pa un unidad comercial, tabata responsabel pa contròl di entrada di e unidad comercial y enbolbí cu evaluacion di casonan di negoshi.

Den diferente posicion den su carera, Joanne Balentien-Nicastia a coge experencia tambe den benta y mercadeo.

 

Mirando e experencia di trabou y e trayecto di preparacion profesional di e CFO nobo, WEB ta convencí cu e por duna un contribucion positivo na futuro desaroyo di e organisacion di WEB y den nos comunidad.

WEB ta yama Joanne Balentien-Nicastia bon-biní y ta dese’é éxito cu su trabou nobo!

Pa mas informacion òf eventual pregunta por tuma contacto cu: WEB Bonaire.

Top