Jocelyn Martinez ta bira ganadora di Copa Hubenil Gobernador Felipe B. Tromp

E hoben Jocelyn Martinez ta e ganadora di Copa Hubenil Gobernador Felipe B. Tromp pa aña 2016/2017. Jocelyn a nace dia 10 di september 2002 y na edad di cinco aña el a wordo diagnostica cu Autismo. E tabatin un pasion grandi pa pinta, lama, yoga y tennis.

E ta bishita Fundacion Centro di Educacion Special (CEDES) y hunto cu diferente otro amigo y amiga.

 

Den tur su acividadnan Josy ta ricibi apoyo grandi di su mayornan y henter famia.

Durante aña 2015, Josy cu apenas 13 aña di edad a atende varios curso na Atelier 89, bou guia di Elvis Lopez. Desde 2011, Josy ta atendiendo les di arte na Fundacion MIRA. El a gana e segundo lugar den e competencia di arte di e banco RBC na 2015.

Na 2016, Josy a tene su prome exposicion na BEAM y esaki tabata un exito completo.

Den cuadro di celebracion di Dia Nacional, 18 di maart 2017, Josy a gana e segundo premio den un competencia di pintamento pa scolnan patrocina pa SETAR. E premio cu el a gana tabata e suma di mil florin pa su scol Dun’un Man.

 

E mayornan di Josy ta inverti hopi tempo den e desaroyo di Josy ya cu nan ta kere cu tur mucha tin derecho pa desaroyo su mes apesar di su limitacionnan. E mayornan ta desea pa Josy ta manera un “rol model” pa otronan. Pero nan ta consciente cu tur esfuerso mester bin di tanto e mayornan y e mucha. Hunto lo logra hopi mas. Participacion na actividadnan di arte of deporte ta manera un terapia special pa tur hoben y ta algo cu mas y mas mester wordo stimula den nos comunidad.

 

Recientemente, Josy y otro amigitonan a tene un exposicion exitoso na La Cabana titula “Different Not Less”. Otro curso cu Josy ta atendiendo ta di manicure y pedicure y lo finalisa esaki durante luna di mei proximo.

Josy a wordo escogi pa ta portada di e calendar di New India pa luna di april 2017.

Top