Jonathan Thiel, miho conoci como Jeon, lo ser reconoci pa su trayectoria y logronan

Durante e competencia di Arte di Palabra na Cas di Cultura, dos persona lo ser reconoci durante di e mirando nan trayectoria y logronan.

E aña aki, Comision Arte di Palabra Aruba, a propone pa duna reconocemento special na un hoben cu a destaca y a contribui na nos idioma materno Papiamento, cu su creacionnan artistico y cancionnan.

Mirando tur e diferente composicion cu el a traha, cual ta un arte di palabra riba su mes, a tuma e decision di nombra sr. Jonathan ‘Jeon’ Thiel como un ehempel pa nos hobennan, pa acepta un reconocemento pa aña 2017.

 

BIOGRAFIA

Jonathan Thiel ta naci na Aruba 27 di januari 1991. Yiu di Robert Thiel (musico) y Francia “Anchi” Thiel. Rumannan Jean-Paul, Rozanne y Melanie. Jonathan ta bin di un famia musico.

 

Na edad di 8 aña Jonathan a cuminsa haya les di piano cerca su tata (Robert Thiel). E motibo di con el a cuminsa siña ta paso el a gaña su juffrouw di basis e tempo ey cu e sa toca Piano y e ora juffrouw a pidie pa toca e siguiente dia na e fiesta di Pasco di scol.

E ora el a core bin cas y siña e prome notanan di Jingle Bells. Asina tambe e interes pa musica a cuminsa crece y tambe a cuminsa canta y a participa na diferente festival.

Jonathan ta un Musico, Areglista, Compositor, “Producer”, y tin su mesun “homestudio”.

 

Cu un edad hoben Jonathan a drenta e grupo di gaita Sensacionales y a logra saca su prome Hit pa temporada di pasco cua ta “E gaiton”. E siguiente añanan Jonathan a sigui canta y toca den diferente gaita, mane Ritmo y mas, Gaita Sensacionales, Katatumbo y Katatumbito.

Tambe el a haci diferente composicion y areglo pa diferente gaitanan y artistanan, bandanan local y internacional.

 

Dia 2 di augustus 2007 a subi escenario prome biaha na Corsou cu Basic One y di e dia el a cuminsa bay Corsou mas biaha pa diferente presentacion. El a haya diferente oportunidad pa bay Boneiro, Corsou, Saba y Hulanda pa duna presentacion cua ta paisnan cu tin su cancionnan den top constantemente.

 

El a siña toca diferente instrument manera baho, cuarta, wiri, conga, piano, acordeon, timbal y tambe drum. Lo sigui enfoca mas profundo riba su musica pa sigui crece internacionalmente y sigur keda hiba e mensahe positivo na Papiamento mundialmente.

 

Jonathan su hitnan ta conoci no solamente na Aruba pero tambe Corsou, Boneiro, Saba, Colombia, Venezuela y tambe Hulanda. Na diferente ocacion el a sali Artista di aña, cancion di aña y tambe video clip di aña. Tanto na Aruba pero tambe na otro islanan.

 

Tambe por menciona cu na 2016 el a sali cancion di aña na tur e radionan na Aruba cu a saca cancion di aña. El a sali artista di aña y tambe “Dushi bida” a sali video clip di aña 2016, un video cu tin mas di 1.7 miyon viewers riba youtube.

 

E stap, e rumbo diferente

Aña pasa na 2016, Jonathan a dal un stap totalmente diferente ora el a yega Hulanda, na momento cu el a hay’e confronta cu un problema di salud cu a pone para keto y realisa con importante bida ta, pa dianan largo ta yora cu un bulto tras di su cabes, cu yen pregunta, pero awe e ta agradecido cu Dios ta curando e y cu Dios ta e guia pa pone unda cu e ta awe, treciendo e mensahe positivo pa Aruba y tambe pa e otro islanan.

 

Jonathan tin hopi plannan pa futuro y tambe colaboracionnan cu artistanan internacional, su meta semper lo keda pa promove nos papiamento mundialmente.

Top