Joselin Croes (POR): Focus Group cu hobennan di Universidad di Aruba riba Cuido Medico

Joselin Croes ta duna un danki di curason na e hobennan di Universidad di Aruba cu a pone nan mes disponibel pa comparti nan preocupacionnan y bin cu nan ideanan pa yuda Aruba progresa.
Dos siman pasa Joselin a publica e resultado di e Focus group riba e tereno di Turismo, Medio Ambiente y Enseñansa y awor falta Salubridad Medico y Economia.

Pa cu Salubridad Medico e input di e hobennan ta:
Mester bin cu un solucion pa e hobennan cu a studia medicina den regio cu no por haya trabou na Aruba pa via cu nan no tin acreditacion “BIG”. Nan a haya lening di Aruba nan ta bek pa traha y nan no por traha.

Pa soluciona e problema di “wachttijd” di tin ora mas cu 6 luna pa un pacient por wak un specialista nan ta pensa cu kisas por habri mercado pa mas specialista pero dunando preferencia na e specialista local y claro pa bin cu exigencianan estricto pa trece specialistanan cu experiencia Aruba.

Nan ta kere cu Aruba mester traha mas riba cuido medico preventivo cu riba cuido medico curativo. Mester inverti mas den yuda e pueblo ta mas consciente di come saludabel y haci mas ehercicio ya tambe pa nan haci general checkups at least un bes pa aña. Introduci un nutricionista na scol pa guia e hobennan pa come bon y bin cu deporte den tur scol pa yuda tene nan fit.
Un studiante ta conta cu na Costa Rica mayoria huisarts of specialista tin un camber cu ekipo pa ehercicio na unda tanten cu e pacient ta warda nan ta yud’e haci ehercicio y ta siñ’e kico e mester haci pa keda fit y kico e mester come. Nan lo desea pa pone un presupuesto mas grandi pa traha preventivo y no curativo.

Nan ta kere den medical tourism como un otro forma pa promove economia dus Private Urgent Care (UCA), Medical Center den estetica cu ta hopi popular den Latino America.

Pa yuda subi calidad di e servicionan na hospital por introduci extra bijscholing pa tur nurse cu kisas un periodo di stage di 6 luna na un hospital den regio.
Introduci Multi Disciplinaire Care cu ta inclui psychologen y palliative care pa malesanan straño y grave.

Nan ta sinti cu tin hopi abuso tumando lugar tambe den uso di medicina, nan ta bisa kisas por bin cu un incentivo pa tur hende cu no ta haci uso di AZV of cu ta uza bou di 10% di nan bijdrage na AZV, tambe nan no ta compronde dicon un paracetamol ta costa AWG 2,50 na bali pero AZV ta paga AWG 12,50 pa e mesun paracetamol na e Botica.

Nan lo desea pa amplia Universidad di Aruba cu un Universidad Medico cu ta inclui un Medical Research Center pa e hobennan cu kier studia aki y cu kier bin traha bek na Aruba den e ramo aki.

Un punto di hopi preocupacion awor di nan ta cu docternan di cas y specialista ta limita dor di AZV na cierto cantidad di Echo, X-Ray y cantidad di pacient cu nan por wak dus si nan yega nan maximo nan no ta wordo paga pa cual motibo hopi biaha nan ta wanta di duna e opdracht aki pa un pacient pa nan no pasa nan cantidad.

Top