Joselin Croes (POR): Lo traha duro pa Aruba haya un centro special di detencion pa hobennan

Como abogado penal, Joselin Croes varios bes a defende hobennan cu ta cay cera pa motibo cu nan a comete un of otro acto criminal. Hopi biaha ta pa hortamento, atraco, bendemento di droga, traficacion di droga, pelea den gang, stacamento di otro cu cuchiu na scol, joyriding, etc.

 

Ta papiando di hobennan entre 12 pa 18 aña. E maneho actual di OM ta pa no cera hobennan jong den KIA. Nan lo purba prome pa yuda e hobennan via reclasering, formacion social of duna nan un scual y despues di 10 dia cera na Warda di Polis laga nan bay cas bek.

Pa esnan cu a comete un acto criminal pisa of ya caba a cay cera den pasado lo por haya castido pisa y lo bay cera den KIA hunto cu e adultonan, segun Croes.

 

KIA no ta brinda e hobennan aki e oportunidad pa caba nan studio den KIA.

Tampoco e ta brinda nan e oportunidad pa den un ambiente sano prepara nan pa drenta bek comunidad y caba scol y haya un trabou.

E problema di criminalidad, mal uzo di droga, alcohol, mal comportacion y problema di gang ta uno grandi cu tin consecuencia fatal riba nos turismo y nos comunidad, Croes ta splica.

 

Na aña 2014 hoofdofficier van Justitie Peter Blanken a skirbi un articulo den Amigoe na unda el a adverti Gobierno rib’e problematica grandi y creciente di “jeugdcriminaliteit”.

Den e articulo el a señala cu e edad di hobennan cu ta comete un acto criminal ta birando cada bes mas jong cu 12 aña y cu e unico opcion pa e muchanan aki ta e programa di reforma social pa muchanan mas bieu di 18 aña of reclassering, Croes ta mustra.

 

El a indica cu Voogdijraad y Reclassering tin capacidad limita pa por yuda e muchanan aki, paso e mucha mester kier wordo yuda.

Tambe el a bisa cu pa muchanan cu problema psikiatrico y psikico no tin ningun tipo di ayudo na Aruba.

 

Pa loke ta trata KIA el a bisa cu e raport di CPT a indica cu KIA no ta cumpli cu e normanan internacional di detencion y sigur no pa loke ta trata encarcelacion di un hoben.

E centro di detencion cu E Forsa Nobo ta visualisa ta uno na unda e hoben por capacita su mes personalmente, fisicamente y profesionalmente.

E mester di por bay scol tur dia, bay gym, bay un psicologo, pasa dor di un rehab y e mester traha pa gana un salario, Croes ta sigui splica.

 

E centro di detencion mester ta uno moderno cu ta multi facetico cu un parti di dj’e por wordo uza como un boot camp tambe pa rehabilitacion di hobennan problematico. Un centro coreccional pa hobennan cu mester ayudo cu disciplina, valor y moral.

Un centro cu ta brinda e hoben speransa y positivismo pa coregi su mes.

 

E Forsa Nobo POR tin e hende na prome luga, pa nos por brinda un miho calidad di bida na tur famia nos meser yuda cada famia cu ta campa cu problemanna cu nan yiunan cu pa un of otro motibo ta cay den problema di gang, droga, criminalidad.

 

E bon di esaki ta cu nos no mester inventa e wiel. Hulanda na aña 2002 a bin cu un raport yama “Jeugd Terecht” na unda nan a bin cu puntonan di accion pa pak aan e probelma di jeugdcriminaliteit. Aruba tambe bou di tur Gobierno a traha hopi raport con pa pak aan e problema, pero nunca a implementa ningun di nan.

E ta nos compromiso pa duna e hobennan aki un “second chance in life”.

Por ta cla pa implementa e plan di accion necesario pa soluciona e problema di jeugdcriminaliteit, Joselin Croes ta conclui.

Top