Joselin Croes: Proteccion di nos Medio Ambiente mester ta un prioridad den proximo gobernacion segun hobennan di Universidad di Aruba

Den un entrevista cu Joselin Croes di POR e ta conta cu recientemente el a tene un Focus Group riba Turismo, Enseñansa y Medio Ambiente cu un par di studiante di Universidad di Aruba y cu esaki t’e puntonan di prioridad cu nan a duna pa e topico di Medio Ambiente..

 

Pa cu medio ambiente nan kier: Soluciona e problema di dump y di dumpnan ilegal na Aruba. Nan ta haya cu e dump na Parkietenbos ta un peliger pa salud di tur cu ta biba eybanda y e ta un mal promocion pa Aruba su turismo.

Tambe mester bin cu un paro pa cu tur e dumpnan ilegal cu tin rond di Aruba. Nan ta haya cu na  aña 2017 e ta inaceptabel cu tur e tecnologia cu ta existi cu no tin un mihor forma pa deshaci di sushi na Aruba.

 

Nan ta preocupa cu e impacto negativo di CITGO riba nos medio ambiente. Bin cu un maneho estricto di reciclahe na Aruba: Nan ta contento cu e “plastic ban”, pero nan kier pa mas wordo haci. Nan kier pa traha riba concientizacion di reciclahe na Aruba, pero nan kier tambe pa Gobierno bin cu un maneho estricto di reciclahe na Aruba.

Nan kier pa bin un paro na destruccion di naturalesa. Nan kier pa stop di kibra naturalesa cu construccion di mas hotel y condominium.

Tambe nan kier pa bin cu regulacion y control riba tour operators pa nan no daña nos beachnan y nos parkenan cu ATV’s.

 

Mehora transporte publico lo drecha medio ambiente. Un otro cos cu nan a trece dilanti ta cu mester mehora e transporte publico di Aruba.

Esaki lo yuda hopi hoben y trahador yega nan scol y nan trabou na ora y e lo drecha e problema di trafico y e lo yuda e medio ambiente.

Joselin Croes y su plataforma E forsa Nobo-POR a priminti di traha BOTTUM-UP.

 

Joselin Croes desde cu el a tuma e decision di drenta politica y sirbi su pueblo e ta sintando semanalmente cu docentenan di scol, comerciante, trahador, studiantenan y bishitando cas pa scucha kico ta importante pa cada persona y kico t’e preocupacion cu ta reina y kico nan kier mira den e plan di gobernacion di e Forsa Nobo POR.

 

Joselin den su entrevista ta bisa cu aunke cu pa hopi hende kisas esaki no ta un topico di importancia, e hobennan aki cu a tuma parti n’e Focus Group si ta haya cu proteccion di nos medio ambiente mester ta un prioridad den e proximo gobernacion.

Nan ta desea un Aruba limpi, sano, cu hopi flora y fauna pa nan por biba aden. Nan ta haya cu e pueblo mester ta mas conciente riba reciclahe y con pa deshacu di sushi.

 

Nan no kier pa Aruba perde su encanta tampoco y bira un isla di puro concrete. E ta duel nan di mira con varios bestia y matanan tipico na Aruba ta muriendo y casi bo no ta mira nan mas.

 

Joselin a tuma bon nota di tur nan puntonan y sigur lo inclui cada un di nan den e Plan di Gobernacion di POR.

 

 

Top