Joseph Furst, Wynwood BID: ‘Motivacion di Gobierno pa stimula sector priva manera tin na Aruba, bo no ta wak tur caminda’

Joseph Furst ta kere cu ta algo hopi bon cu na Aruba tin un Prome Minister kende ta enfoca pa pusha iniciativanan pa stimula crecemento di sector priva y revitalisacion di barionan.

Furst ta conoce tambe di esaki como cu e ta traha cu e grupo cu a revitalisa barionan cu awe ta destinacionnan conoci rond mundo manera Soho na New York y Wynwood na Miami.

 

E tabata di bishita riba nos isla siman pasa pa conoce Oranjestad y su alrededornan riba peticion di Gabinete Mike Eman.

E idea ta pa wak e potencial cu nos capital tin pa por ripiti e bon practicanan cu por laga Playa haya mas bida comercial, residencial y cultural.

Como Managing Director di Goldman Properties y na mesun momento President di Wynwood BID (Business Improvement District), Joseph Furst tin hopi conocemento y experiencia di con pa laga un bario crece economicamente dor di crea e conexionnan corecto entre comercio y artistanan cu ta atrae mas publico p’e areanan aki.

 

Durante su dia di djis un par di dia na Aruba, el a señala caba algun bentaha cu nos capital tin y cu por traha cune.

E prome t’e boluntad di parti di e sectornan publico y priva y e di dos t’e cultura unico di nos isla.

“Ta un bunita lugar, nos ta contento di t’aki. Tin tremendo arkitectura y un gran historia cu nos ta purbando di conoce mihor pa wak con nos por tuma esey y hib’e dilanti den bida moderno na Aruba,” asina Joseph Furst a bisa.

“Un di e cosnan cu nos ta haya hopi interesante ta con diverso e cultura aki ta y cu e hendenan ta bin for di asina tanto lugar rond; esey ta algo cu mester wordo celebra.”

 

Den e compania Goldman Properties, Furst ta hopi biaha e persona di contacto cu Gobierno di, p.e. Miami.

Basa riba su experiencia, el a bisa cu ta fantastico e situacion na Aruba, pasobra na Merca  Gobierno no ta envolvi y tur cos ta bin for di sector priva.

Pesey, e hecho cu en berdad tin un sector publico aki na Aruba cu ta motiva pa purba yuda stimula e crecemento di sector priva y e revitalisacion di barionan, ta algo cu hende na Miami ta papia di dje cu lo ta bon pa sosode, pero no ta pasa.

 

Aruba t’e unico isla cu Goldman Properties ta trahando cune. Joseph Furst ta admiti cu nan ta haya hopi interes pa comparti nan ‘best practices’ y nan experiencia pa influencia otro hendenan cu por haci un diferencia p’e comunidadnan cu nan ta biba aden.

Ademas di a haci un recorido den centro di ciudad, Furst y Jessica Goldman, CEO di Goldman Properties tambe a reuni cu Minister President Mike Eman y Minister di Asunto Economico drs. Richard Arends y nan ekipo. Tambe a duna un presentacion na representantenan di sector bancario, comercial, emprendedor y mentenan creativo.

 

Top