Juan Chabaya Lampe “Padu del Caribe” ta cumpli un aña mas di bida

Prome Minister Eman presente na e ocasion special aki

 

Dia 26 di april Padu del Caribe ta cumpli un aña mas di bida. Padu a yega e edad respeta di 97 aña. Un bida fructifero yena di momentonan bunita pa hopi aña den compania di su casa Daisy, yiu Vivian y nietonan. Un bida unda musica a hunga un rol prominente.

 

Luna pasa, Gobierno di Aruba a dedica un plaza na nomber di Padu. Un dedicacion cu a bay compaña cu un anochi bunita di musica y canto. Plaza Padu ta un bunita obra mahestral unda tanto Padu como e dos co-autornan di nos Himno ‘Aruba Dushi Tera’ Hubert ‘Lio’ Booi y Rufo Wever a keda reconoci pa Gobierno y Aruba henter. Tabata un anochi inolvidabel.

 

Un cumpleaños di 97 aña no por pasa bay sin mas. Ta un dia special pa un hende special. Pesey cu un dia prome, teniendo cuenta cu e edad respeta di e cumpleañero, su amigonan a organisa un desayuno den La Vista Restaurant na Marriott Hotel unda famia y amigonan di tur tempo a yega hunto pa celebra e antesala di e hacimento di aña di Padu.

 

Prome Minister Mike Eman, ademas di ta famia di Padu ta un amigo y admirador, tambe tabata entre e invitadonan cu a bin desea Padu tur cos bon pa e aña cu ta sigui.

Awe, riba dia di su cumpleaños Padu ta ricibi su hendenan na su cas cu semper ta bin pa brase y desee mas aña rib’e mundo aki. Pabien Padu!

Top