Juancho Pablo y Frans Croes a skop bala pa inicia Play-off 2016/2017

Diabierna anochi a tuma lugar apertura di e Play-off 2016/2017 di Division Honor di Arubaanse Voetbal Bond. E anochi aki tabata yen di fanatico cu a bay apoya nan team, esta Britannia y Dakota. Tur hende tabata ancioso pa mira kende lo bay cu e prome victoria.

E aña aki a dedica e campeonato na Theo Ruiz, Cadochi Kock, Betto Peña y Frans Dijkhoff.

 

Vice Presidente di AVB, Marlon Werleman, a inicia e anochi cu palabra di bon bini na tur esnan presente, pero tambe tabata contento di mira cu poco poco e campeonato di futbol Division Honor ta yegando su final.

Minister di Salud Publico, Cuido di Nos Grandinan y Deporte, dr. Carlos “Alex” Schwengle tambe tabata presente p’asina presencia e wega y sigui sostene deporte.

 

Henter e anochi tabatin entretenimento y pasa un momento agradabel. Tambe a haya oportunidad pa saca potret e anochi aki cu e backdrop di AVB di e Play-off hunto cu promo girls.

Un biaha mas Dakota tabata t’ey cu su DJ p’asina duna sosten n’e team Dakota.

E anochi aki tabatin 2 invitado special cu e teamnan a invita.

Dakota a invita Juancho Pablo, kende ta un ex hungador grandi y clasico di Dakota, mientras cu Britannia a invita Frans Croes, kende ta un ex hungador, pero un fanatico grandi di e team cu ta bay tur wega di tur division di Britannia.

 

Juancho Pablo y Frans Croes tabatin e honor di a skop e prome bala p’asina duna inicio di e Play-off 2016/2017.

Despues di e palabranan di e invitadonan di honor, e bandera di FIFA a subi veld, e refereenan a subi tereno, sigui pe teamnan acompaña pe muchanan di nan team.

E hoben Etienne Yarzagaray a canta himno, pero tambe a entretene tur hende durante e medio tempo. Tur hende a disfruta di e anochi y a pasa un momento agradabel.

 

Wega lo continua awe 17 di mei cu e di dos wega entre Dakota y Britannia, kendenan lo busca un victoria. E wega lo ta na stadion na Dakota pa 8:00 PM. AVB ta invita fanaticada di ambos team y amantenan di futbol pa yega stadion p’asina apoya nan team preferi y pa mira weganan di calidad.

Top