Julie de Cuba: Respet pa derechonan humano no ta un escogencia (Parti 3)

Mirando cu na Aruba desde comienso di nos Status Aparte, poco poco respet a cuminsa disparce, partido politico ReD Democratico a keda funda dia 30 di mei 2003 pa e. o. implementa respet pa derechonan humano. Mester bisa acerca cu respet pa derechonan humano no ta un escogencia sino un mandato tanto di Naciones Uni como di nos mes como sernan humano, segun Julie de Cuba.

 

  1. Respet pa derecho di minoria

Na e momento aki tin un minoria cu a cay den spiral di miseria. Lo apoya e grupo aki e. o. cu medionan di agricultura, permacultura y piscamento pa lanta cabez bek.

Lo bin cu cooperativa‐supermercado cu ta ofrese prijsnan barata y baha e costo di bida. Lo apoya pa e clase medio bira mas fuerte dor di duna tur sorto di facilidad na empresanan chikito y contraresta e tendencia actual cu e clase media ta birando un minoria;

 

Nos Constitucion ta hopi cla, tur hende ta igual y no por keda discrimina a base di color, raza, religion, nacionalidad, edad, handicap, sexo y identidad sexual. Lo no tolera discriminacion den ningun sentido. Lo bin cu un plan nacional contra discriminacion y un “meldpunt” na Departamento di Trabou unda por denuncia cualke forma di discriminacion riba tereno laboral;

 

Aruba lo reconoce e derechonan di homosexualnan igual na e derechonan cu heterosexualnan tin. Cualkier forma di discriminacion of violencia contra parehanan homosexual lo no keda tolera. P’esey lo bin un ‘meldpunt’ na Cuerpo Policial unda por haci denuncia anonimo di discriminacion di parehanan homosexual, de Cuba ta splica.

 

  1. Respet pa derecho di pueblo riba bon gobernacion

Tur esaki ta posibel dor di elimina gastonan inecesario di Gobierno pa financia e puntonan di accion aki. Lo elimina e fenomeno di coordinador/consultant, lo implementa e “kerntakenanalyse” unda ta stipula cua ta e tarea especifico di Gobierno y ta stipula pa ley e maximo na funcionario publico pa cada departamento, pa cada nombracion politico e Minister concerni ta keda poni personalmente responsabel y ta keda persegui legalmente, lo instala un comision nacional pa personal di Gobierno cu lo ta un instancia independiente di politica. Lo bin control estricto riba cumplimento di ley di destaho publico. Ta elimina corupcion dor cu integridad ta un exigencia legal tanto pa Ministernan y Parlamentarionan. Dor di e maneho aki hunto cu accion di e Afpakteam lo spaar hopi placa cu lo keda inverti den nos puntonan di accion, de Cuba ta mustra.

 

 

Vakminister

Partido ReD Democratico a ser lanta pa bin cu cambionan fundamental pa Aruba haya bon gobernacion y integridad den gobernacion. Den un democracia Parlamentario, ta esun cu pueblo a duna e confiansa directamente pa medio di su voto, mester tuma asiento den Parlamento. Pueblo ta vota pa su parlamentarionan y no pa Ministernan.

E statuutnan di ReD Democratico ta mustra cu un candidato riba lista di ReD Democratico no por bira Minister. Un Minister pa partido ReD Democratico por ser califica como “vakminister”. E Minister ta un persona profesional y experto cu no ta politico, de Cuba ta termina bisando.

Top