Julitsa Franken den top 100 mihor alumno di Biologie

Julitsa Franken ta representa Colegio Arubano n’e Nederlandse Biologie Olympiade na Utrecht

 

 

Colegio Arubano a participa n’e competencia escolar p’e materia di Biologie conoci bou di e nomber “Nederlandse Biologie Olympiade”.

Alumno Julitsa Franken di VWO 6 a termina den e top 100 entre 11197 participante. Ferghall Vlaun di klas VWO 3 tin e mihor resultado entre e participantenan di e Biologie Olympiade Junior.

 

“Nederlandse Biologie Olympiade” ta un competencia entre e scolnan secundario na Hulanda. E Olympiada ta existi pa mas di 25 aña.

For di 2015 Colegio Arubano, como unico scol internacional, ta competi. E aña aki un tiki mas cu 24000 alumno di 325 scol na Hulanda y Colegio Arubano a forma parti di e prome rond di competencia. Colegio Arubano a participa cu 80 alumno di klas VWO 3, VWO 5 y VWO 6.

 

E klasnan di VWO 3 di Colegio Arubano tambe a participa n’e competencia di Biologie Olympiade Junior.

Un total di 8824 alumno di VWO 3 di e scolnan na Hulanda y Colegio Arubano a participa.

E competencianan a tuma lugar dia 1 y 3 di februari na Colegio Arubano. E alumnonan di klas 3 a traha un examen di 50 minuut y e alumnonan di klas 5 y 6 a traha un examen di 90 minuut.

E examennan ta wordo manda for di Hulanda y tur scol participante ta traha e mesun examen.

E examen ta contene preguntanan di tur material di biologie cu ta wordo trata den klas y algun brain-crackers cu ta pone e alumnonan pensa.

 

RESULTADO

E alumnonan di klas VWO 3 di Colegio Arubano a score riba e averahe nacional di Hulanda. Ocho alumno a finalisa den e top 10% entre tur e participantenan.

Nan ta ricibi un “oorkonde” special di e comite organisador di Hulanda.

E ganador ta Ferghall Vlaun, sigui pa Kay-Millyn Soto y Sarah Rafini. Hunto cu e alumnonan Nicole Croes, Jared Yuyes, Isabella Netto, Jowen Banwarie y Indy van Vliet, nan ta forma e grupo di 8 studiante di klas VWO 3 cu a termina den top 10% di e Biologie Olympiade Junior.

Tur e ganadornan a ricibi un regalo di Totto y a ricibi nan certificado for di man di conrector sra. M. Wernet.

 

E mihor alumnonan den e materia di biologia di klas VWO 5 tambe a participa n’e Nationale Biologie Olympiade hunto cu algun alumno di VWO 6.

E ganador absolute ta Julitsa Franken sigui pa Roderick Tapia y Samuel Richardson. E logro di mas grandi pa Colegio Arubano t’e resultado di Julitsa Franken, alumno di VWO 6.

Julitsa a participa na 2016 caba n’e Olympiade y a resulta e ganador absoluto e aña ey.

E biaha aki e ta surpasa su resultado y ta termina den e top 100 mihor alumno di biologia entre mas cu 11000 participante di Hulanda y Aruba.

Julitsa Franken a logra pasa p’e siguiente rond di competencia cu ta tuma lugar den luna di april proximo.

P’e competencia aki, Julitsa ta biaha pa Hulanda unda cu e ta bay sigui un dia di training special na Universidad di Utrecht.

 

“E resultado di e prome rond ta duna aceso n’e grupo di alumnonan cu ta cay den e top 100 di tur participante pa sigui p’e di dos rond cu ta tuma lugar na Hulanda.

Departamento di Biologia di Colegio Arubano ta hopi contento cu e plan cu nan a incorpora den e curiculo di biologia a duna su frutonan.

Awe nos tin un representante di Colegio Arubano, den persona di Julitsa Franken kende ta bay representa nos scol y alabes pais Aruba.

 

Danki na Aruba Bank NV cu a mira e importancia di e competencia aki y tabata cla pa duna su aporte y a percura pa Julitsa por a ricibi su pasashi p’asina e por participa na Utrecht banda di e mihor alumnonan di biologia di henter Hulanda”, asina Zaida Everon, docente di biologia y organisador di e Biologie Olympiade na Colegio Arubano a splica.

 

Un felicitacion ta bay p’e alumnonan cu nan tremendo resultado y e mihor deseonan di animo pa Julitsa cu su participacion na Utrecht, Hulanda.

 

 

 

 

 

Top