Ken lo bira Aruba su Atletanan di Aña 2016?

Pa 14 aña consecutivo un comision consistiendo di representantenan di e organonan deportivo manera Aruba Sport Unie, IBISA, Ministerio di Deporte hunto cu e reportero y/of redactornan deportivo di prensa, radio y television, den un forma organisa y imparcial ta studia y repasa e curiculo di tur e nominadonan, pa na final scoge e Deportista di Aña y reconoce e figura deportivo pa su prestacion.

 

Durante di un anochi di gala lo haci entrega di e maximo galardon n’e atleta cu a destaca den e aña deportivo 2016.

E evento di galardon, Premio Excelencia den Deporte t’e unico evento cu ta reconoce e trabou duro hiba pa nos mihor deportista y dirigentenan den tur edad durante e aña deportivo tras di lomba.

For di inicio di e premiacion na aña 2003, atletanan den diferente ramo di deporte a gana e premio maximo y bira Aruba su Deportista di Aña.

 

Mas cu claro esaki no a bay sin su esfuerso y sacrificio di tanto e atleta y su federacion cu e ta representa.

Di e atletanan cu a yega di wordo premia den pasado algun di nan ainda ta activo na Aruba mes, mientras otronan a dicidi di bay biba den exterior y continua cu nan estudio y sigui practica nan deporte preferi.

Ta bon pa bisa cu cada aña e Federacionnan Deportivo ta reacciona den forma positivo, mientras un gran parti for di tempran ta cuminsa traha riba nan nominadonan.

Mas cu claro por mihor y ta spera cu e aña ki lo haya reaccion di mayoria Federacion Deportivo afilia.

 

E comision organisador ta spera cu tur federacion lo haci nan maximo esfuerso pa manda nan nominadonan p’asina e deportistanan di cada ramo di deporte no keda perhudica.

E fecha y dia di e gran evento lo ta 24 di maart benidero. Ta spera cu tur federacion lo entrega e informacion di su nominado na tempo esaki mas tarda diarazon 1 di maart p’asina n’e anochi di gala e deportistanan por sinti nan mes honra di a wordo reconoci pa tur e sacrificio y esfuersonan haci den e temporada deportivo 2016 cu el a destaca den dje.

Top