Ken lo para responsabel p’e daño haci n’e consumidor dor di e estafa contra SETAR N.V?

E tabata un noticia cu a mira lus di dia practicamente 1 aña pasa, ora cu Panama Leaks a publica mas di 11 mil documento cu a descubri actonan fraudulento dor di diferente persona, instancia, compania y Gobiernonan rond mundo.

Aruba su nomber no a keda afor y por a mira diferente nomber di hendenan local cu a keda publica den e tambe yama “Panama Papers”.

 

Pero tabata dialuna cu a pasa cu un escandalo a yega Aruba ora cu The Miami Herald a publica un articulo caminda ta papia di un demanda cu nos compania estatal di telecomunicacion, esta SETAR N.V, a entama contra su trahador kende tabata encarga pa cumpra e productonan celular cu dicho compania ta bende.

 

Den e demanda ta papia di hechonan manera: Suministro di telefonnan celular di segunda mano bou di e promesa di tabata nobo, como tambe di a bende productonan celular cu SETAR N.V cu tabata costa 20% mas hopi compara cu e prijs riba mercado internacional.

Teniendo e hechonan aki na cuenta, nos por conclui facilmente cu esun directamente afecta t’e consumidor cu den e ultimo decada a haci uzo di e servicio y productonan di SETAR N.V.

 

Den un comunicado di prensa emiti dor di SETAR N.V, e compania a confirma e informacion cu a keda publica den The Miami Herald dialuna atardi.

SETAR N.V den su comunicado a garantisa cu tur nan productonan ta di alta calidad y original, como un manera di purba trankilisa e gran cantidad di cuestionamento cu a keda haci riba social media.

Pero loke cu SETAR N.V no a papia di dje t’e 20% extra cu tur nan clientenan mester a paga pa nan aparato celular den e ultimo 10 añanan.

 

Tin hopi consumidor disgusta cu SETAR N.V pa cu e fraude aki, y tin cu ta sondeando e posibilidad pa demanda e compania cu nan mesun daño y perhuicio.

Aunke cu SETAR N.V a sigura di no a, of ta bende aparato celular di un calidad inferior, tog hopi consumidor ta keda cu e duda y ta puntrando pa clarificacion encuanto nan producto(nan) cu a keda adkiri den e ultimo añanan.

 

MINISTERIO PUBLICO

For di vocero di Ministerio Publico, nos a haya informacion cu nan na OM no tin ningun investigacion andando. No tin ningun denuncia oficialmente haci.

Loke si nan sa, cu OM a wak cu SETAR N.V. si y cu ademas tin caso andando na Merca.

Na Aruba mes no tin ningun caso.

 

REUNION DI PARLAMENTO

Parlamento despues di a tuma nota di e publicacionnan aki, e Presidente di Comision di Telecomunicacion y Transporte, Chris Romero a pidi un reunion di e comision cu caracter di urgencia y si por awe mes.

Chris Romero kier un reunion di e comision, y kier pa ta presente, Director di SETAR N.V. y Hunta Directiva di SETAR N.V. pa nan bin duna cuenta.

Mientrastanto Parlamentarionan mr. Andin Bikker y drs. Marisol Lopez Tromp a pidi un reunion publico di Parlamento, ya cu nan kier pa pueblo haya sa ta kico a sosode, y si no tabata pa Panama Papers, e situacion aki lo a sigui manera nada a pasa.

No ta conoci ki dia e dos reunionnan aki lo por tuma lugar.
OBSERVACION
Nos di AWEMainta a dicidi di consulta cu un experto di e caso aki, kende ta prefera di keda anonimo. Encuanto di e comentarionan: Dicon a haci denuncia na Merca y no na Aruba?

Wel esaki ta debi  cu ningun di e companianan envolvi, NO tin hurisdicion na Aruba. Pesey e caso na Merca. Ey nan e demanda tin efectividad.

Na Aruba un caso asina, nan lo trate duna veredicto, pero no por wordo ehecuta.

 

Bou di e leynan Hulandes e sospechoso lo no haya mucho aña di castigo. Na Merca tin un ley mas specifico pa casonan asina, y por yega te cu 50 aña di prison.

Loke cu SETAR a haci ta di sue tur e companianan menciona. Na Aruba nos no por sue ningun hende of compania.

Si nos por pidi daño y perhuicio, cu pa ley ta regla te cu 50 mil forin. Na Merca, e ta infinito.

Pesey na Merca y no na Aruba.

 

Corda e caso di hotel ex Radisson, unda e Gerente General haya un boet den corte na Aruba. Y na Merca e guy a keda hari nan.

Otro bon ehempel t’e caso, unda Minister Tico Croes (AVP) a lanta caso contra difunto Ralph Sanches na Miami, encuanto Racetrack. Den dicho caso Corte a pidi pa tende e.o. e actual Minister Mike de Meza, Junior Croes, ruman di Glenbert pa nan envolvimento y ora nan a haci declaracion bao di huramento, Gobierno di Aruba a perde e caso.

Top