Kico ta pasando? 25 Persona retira na Aruba Airlines

Den fin di siman a yega na nos mesa di redaccion cu como 25 persona a haya nan retiro na Aruba Airlines. Kico t’e motibo, di parti di gerencia mes, nan no kier duna ningun informacion. Nan a bay asina leu di laga cada trahador firma un documento, cu kico cu por pasa, nan lo no divulga nada di e compania.

Pero no t’awor, pero di algun luna caba, por nota cu Aruba Airlines a trece un tal Gonzalez den cas, pa haci trabao sushi pa nan, esta retira mas tanto trahador cu e por.

 

No por bisa cu Aruba Airlines tin problema financiero, maske cu ta conoci, cu nan a perde gran parti di e buelonan charter di Miami pa Cuba, pero esaki tabata di spera.

Te cu dia di awe Aruba Airlines su accionistanan Venezolano tin problema cu Onno de Swart, kende tin hasta beslag riba fondonan di e compania, despues cu el a gana un caso den Corte.

Tin informacion ta circula tambe cu ta retira trahadornan Arubiano, pero ta trece Venezolano aden pa haci nan trabao.

 

Aparentemente tur esaki cu consentimento di Gobierno di Aruba. Si t’asina, esaki ta di lamenta.

Y manera AWEMainta a publica recientemente, e compania di aviacion Dominicano PAWA, cu awor ta yudando e aerolinea di Aruba, y hunto cu Aserca a bula e buelonan di e avion di registro P4AAA ora cu esaki a daña.

T’e mesun PAWA aki lo a paga e control di mantencion (C-check) cu ta algo hopi costoso y cu por facilmente core den centenares di miles di dolar.

 

Y tur hende den mundo di aviacion sa cu e persona clave tras di PAWA y Aserca t’e conocido Simeon Garcia, kende den pasado a maneha Air Aruba y kende a causa e ciere di e aerolinea. Pesey na Aruba, nan no kier wak Simeon Garcia, ya cu el a pone hopi yiu di tera perde trabao.

Su soño ta di crea un solo compania di aviacion pa sirbi henter Caribe y den esaki e mester di Aruba Airlines tambe.

 

Departamento di Aviacion Civel ta bon na altura di tur esaki, pero no a tuma accion ainda, pasobra manera a ser bisa, ningun hende no a viola ningun ley ainda.

 

 

Top