Kiwanis Club of Aruba a celebra Dia Universal di Derecho di Mucha

Riba dia 20 di november mundo henter a conmemora y celebra Dia Universal di Derecho di Mucha y en conexion cu e dia aki, Kiwanis Club of Aruba a invita 50 mucha di diferente districto di Aruba, pa un Kiwanis “Kids’ Bus Island Tour”. E tour a cuminsa mainta tempran, caminda e bus di De Palm Tours a busca tur e muchanan y hiba nan bishita diferente punto historico y atraccion turistico di Aruba. E meta di e recorido aki tabata pa e muchanan conoce un poco di e historia y cultura di Aruba y tabatin e oportunidad di bishita nos atraccion turistico y alavez pasa un mainta divertido, yena cu alegria y sorpresa cu e miembronan di Kiwanis Club of Aruba a prepara specialmente pa nan.

E prome punto cu e muchanan a bishita tabata California Lighthouse, caminda nan a ricibi desayuno. Stichting Monumenten Fonds a conta e muchanan e historia di nos faro, alabes tur mucha a ricibi vouchers pa asina nan por bin cu nan mayornan y subi pa asina experencia e Lighthouse tour. E di dos atraccion turistico cu e muchanan a bishita ta Kapel di Alto Vista, Aruba su prome iglesia Catolico, sigui pa un bishita na Bushiribana Gold Mine, unda e muchanan a siña un poco mas di historia di Aruba su mina di oro. E di cuatro punto turistico cu e muchanan a bishita tabata, Cunucu di Chabelito “Kinderboerderij”.  Aki  sr. Ludy Rasmijn a duna informacion y splicacion di diferente bestia di cria y e importancia pa planta fruta y berdura. Despues e muchanan a bishita Casibari Rock Formations, caminda e muchanan a saboria un dushi cuminda cayente  y bou di supervision di e miembronan di Kiwanis Club of Aruba por a subi e piedranan unico di Aruba su herencia. Durante e “Kids’ Island Tour” e muchanan a ricibi: awa, juice, sandwich, apple, banana bread y cupcake. Na final di e recorido e muchanan a ricibi un “surprise bag” yena cu articulo manera, entre otro; bloknote y pen di Aruba, skeiro di djiente, pasta di djente, cup pa bebe awa, handsanitizer, chips y buscuchi.

Nos kier gradici nos miembronan di Kiwanis Club of Aruba, cu a traha cu hopi amor y pasion, sirbiendo e muchanan di Aruba. Kiwanis Club of Aruba tambe kier bisa danki na nos sponsornan cu a haci e dia aki posibel; Aruba Airport Authority, Aruba Aloë, Aruba Tourism Authority, Bright Bakery, Casibari Café, Compra Aruba, De Palm Tours, La Cabana Beach & Casino, La Trattoria Il Faro Blanco, Manrique Capriles, Monumentenfonds Aruba, Sharline Bitorina, Superfood, Villa Floralina y WEB Aruba NV.

Leave a Reply

Top