Kiwanis na Aruba a haci entrega di un “Zippie Voyage Stroller” na baby Zia

Diabierna ultimo den un ambiente Kiwanistico, e tres clubnan di Kiwanis na Aruba, esta Kiwanis Club of Aruba, Kiwanis Club of Palm Beach y Kiwanis Club of Young Professionals Aruba a reuni pa haci entrega di un cheque balora na AWG. 9050,- na baby Zia, contribuyendo asina pa baby Zia haya su “Zippie Voyage Stroller”.

 

Kiwanis su enfasis ta pa sirbi e muchanan na Aruba, por lo tanto, ora cu e clubnan a ricibi e peticion pa e donacion y a lesa e storia di baby Zia su “Cerebral Palsy” via e plataforma social, a keda conmovi y di biaha a tuma contacto cu otro club y uni forsa, pa contribui na un miho calidad di bida pa baby Zia.

 

E momento mas emocionante di e anochi tabata ora cu presidente di Kiwanis Club of Aruba, sra. Aurora Dijkhoff, presidente di Kiwanis Club of Palm Beach, sr. Chejito Croes y presidente di Kiwanis Club of Young Professionals Aruba, sr. Bryan Nemecek, den presencia di e miembronan di dicho club, a sorpresa e mama Mariela y baby Zia cu e check pa e “Zippie Voyage Stroller”. Mama di baby Zia a keda sumanente contento y a expresa su gran gratitud na henter e famia grandi di Kiwanis.

 

Kiwanis ta un organisacion global di boluntario dedica na mehora mundo via un mucha y via di un comunidad cada biaha y tin como lema: Sirbiendo e muchanan di mundo. Kiwanis ta activo den e comunidad Arubano desde 1965.

 

Pa mas informacion di Kiwanis of un di clubnan di Kiwanis of e actividadnan por bishita e siguiente websitenan: www.kiwansaruba.org, www.kiwanisclubofpalmbeach.com y www.kyparuba.org como tambe e paginanan fan riba Facebook: https://www.facebook.com/kiwanisclubofaruba https://www.facebook.com/kiwanispalmbeachhttps://facebook.com/kiwanisyparuba.

Top