KOI KENS

Den e matutino Ingles ‘Aruba Today’ di 9 di maart ultimo a resalta un articulo tocante posibel iregularidad dentro di e directiva di un hotel (chikito) local.

E Vice-Presidente anterior lo a concede su mes compensacion halto contra e reglanan vigente. Hunto cu un otro miembro di directiva e lo a haci su mes culpabel tambe na malversacion. Mientrastanto lo a suspende ambos miembro di directiva, mientras ta haci un investigacion extenso.

Segun e reglanan, tur aña mester entrega un cuenta (audit) for di cual e maneho y administracion financiero ta sali na cla.

 

REALIDAD DI GOBIERNO

Sinembargo, segun ‘Aruba Today’, esaki no a tuma lugar e ultimo 5 añanan. E matutino no ta exclui cu a laga di haci esaki intencionalmente pa preveni cu e iregularidadnan lo sali na cla.

For di e raport ‘Naar deugdelijk openbaar financieel beheer in Aruba’ di Fundacion Gobernacion di Calidad Aruba ta resulta cu Gobierno di Aruba durante e ultimo 55 aña (!), NUNCA a entrega e cuenta anual obligatorio pa ley manera debe ser.

Solamente bou di presion pisa di CAft a entrega recientemente pa di prome biaha un cuenta anual (no aproba!) na tempo.

NUNCA a cumpli cu e stipulacion di ley pa entrega e cuenta anual aproba pa accountant pa mas tarda 3 luna despues cu aña a termina na Parlamento (normal: 5-10 aña laat!).

 

Durante decada no a cumpli cu hopi exigencia di Ley di Comptabilidad. Controlaria General (ARA) a scirbi den casi tur su raportnan “por atribui e fayonan cu a constata pa un gran parti na un administracion deficiente cu ta funciona malo, un organisacion administrativo deficiente y un control interno practicamente ausente. A base di esaki ARA ta di opinion cu tin un situacion hopi preocupante pa cu e administracion. No ta cumpli cu e principionan mas elemental di administracion”.

TUR aña desde 1987 a neglisha e intencionnan di ARA pa implementa concretamente e proyectonan di mehoracion.

Apesar di promesa di varios Ministro di Finansa cu lo mehora e situacion, esaki a tuma lugar te na 2015(!), exclusivamente pa motibo di e presion fuerte di Caft.

 

A institui Caft despues cu Reino a interveni na 2014 na momento cu a bira cla cu e aumento di debe y pago di interes a conduci na finansa publico insostenibel.

Segun investigacion di ARA, e administracion financiero deficiente cu ta(bata) caracterisa e administracion financiero di Pais Aruba, tabata endemico den practicamente tur departamento individual.

Como cu investigacion di pati di CAD y ARA sa tuma lugar riba escala hopi limita, ta inevitable cu esaki (t)a haci cu comunidad di Aruba a y ainda ta perde hopi placa.

 

Segun ARA e administracion financiero di 1989 tabata asina malo cu e no tabata duna ningun bista di e situacion financiero di Pais Aruba. Mas di 10 aña despues ARA ta constata cu “e consecuencianan di e negligencia duradero di e problemanan aki awo ta sali na cla, tumando na cuenta e cantidad di caso di fraude y malversacion (grandi) cu awendia ta sali den claridad”. Esaki a sali bon na cla den e veredicto den e caso contra Prome Ministro den e asunto di Fondo Desaroyo Nobo San Nicolas (FDNSN).

No por a prueba culpabilidad, entre otro pasobra no por a prueba eventual malversacion pa motibo di e caos administrativo enorme.

 

Na mesun manera e reduccion substancial di e castigo di e sospechoso den e caso di laboratorio di Gobierno, na unda Afl. 10 miyon a ‘desparce’ tabata hopi remarcabel. A dun’e e reduccion ey pa motibo cu no tabatin ningun control efectivo, mientras cu esnan ‘mas responsabel’ no a reacciona riba e señalnan cla.

 

MALVERSACION NA GRAN ESCALA

Mas reciente tabatin e caso di malversacion di Afl. 1 miyon na Departamento di Enseñansa. Sinembargo, pa motibo di e falta structural y intencional di personal n’e instancianan di control, e magnitud di e problematica aki no ta conoci y consecuentemente tampoco cuanto daño esaki ta causa na comunidad di Aruba.

Al fin y al cabo Ministro ta responsabel p’e bon marcha di asunto den nan departamento. E ultimo 30 añanan, esaki tabata laga hopi di desea.

 

ROL DI PARLAMENTO

Parlamento lo mester duna un solucion den esaki, pero aki tambe desde principio control ta un terminologia bashi.

Parlamento mes nunca a duna atencion n’e intentonan anual di parti di Conseho Consultativo y ARA pa duna nan derecho di budget mas contendio. Al contrario, tur aña e Parlamentarionan ta permiti Gobierno pa tuma nan haci, aprobando cu forsa retroactivo e gastamento ilegal di placa. Di e manera ey en realidad nan mes ta bay di acuerdo cu debilitacion di nan derecho di budget.

 

Ademas Parlamento no a trata raport investigativo importante di ARA y structuralmente no sa responsabilisa Ministro. Hasta e veredictonan significativo den e casonan di FDNSN y Laboratorio no a hiba na ningun accion di su parti pa mehora e calidad di e administacion financiero.

 

KOI KENS

Segun ‘Aruba Today’, den e caso di e hotel, posiblemente ta trata di malversacion di minimal decenas di mil di dolar pa aña riba un presupuesto total di apenas algun miyon florin. Sinembargo, esey por ta resulta koy kens compara cu locual e posibel malversacionnan di parti di henter un ehercito di probechador durante 30 aña a base di un presupuesto anual promedio di mas o menos Afl. 1 biyon por a costa comunidad di Aruba…

Top