Kok Optica ta conta awo cu 6 establecimento na Aruba

Di generacion pa generacion, cuido di wowo, experticio den bril di bista como tambe di solo tabata y ta un topico diario y di hopi importancia cerca famia Kok-Croes.

Despues di 20 aña di e apertura oficial di Kok Optica den Wilhelminastraat, dia 21 di april proximo, famia Kok ta inaugura oficialmente un optica mas den districto di Noord.

 

Cu e optica nobo aki, Kok Optica ta sigui expande y crece cu un total di 6 establecimento rond di nos isla. E tres rumannan Kok, esta Alexandra, Frans y Rudolph cu a lanta cu e amor, pasion y dedicacion pa nan profesion den e ramo aki, ta splica cu debi na e gran cantidad di personanan cu ta traha den area di Noord, a tuma e decision na comienso di aña pa sigui brinda e servicio di custumber na comunidad di Aruba, pero specificamente pa esunnan cu ta biba y labora den e districto aki.

 

Sea pa chekeo di bista of conseho riba bril, esaki tambe lo ta posibel awor na The Cove Mall situa den e area di Palm Beach banda di Tony Romas.

“Na un forma hopi espontaneo nos a haya e oportunidad pa habri un localidad nobo, cu no solamente ta bunita, pero tambe central y ta permiti nos ta mas cerca di nos clientenan y e comunidad di Noord. Di e forma aki e idea pa habri un optica nobo a cuminsa”, asina Frans Kok a splica.

 

E famia di Kok Optica a sigui splica cu e optica nobo aki ta ofrece lo ultimo den tecnologia, moda di bril y e tienda mes tin tambe un interior moderno, un estilo “fresh”, pero mas cu claro, e servicio y trato na tur cliente lo ta e mesun di custumber, pues uno familiar, personalisa y profesional.

 

“Nos ta invita henter comunidad di Aruba y tambe tur nos clientenan cu ta traha of biba den area di Noord pa pasa bishita nos y experencia un servicio unico den mundo di optica pero tambe pa nan sinti un diferencia riba nan cara y un placer pa nan bista!”, asina e rumannan Kok a expresa y extende nan invitacion na henter pueblo di Aruba.

 

Famia Kok ta sumamente agradecido cu pa mas di 20 aña caba henter e comunidad di Aruba a sa di apoya y duna sosten na nan como empresarionan local, pero tambe a duna e confianza den nan experticio pa cuido di wowo, bista y uzo di bril y contactlens.

 

Henter comunidad di Aruba ta keda cordialmente invita pa e Grand Opening di nos Optica na The Cove Mall banda di Tony Romas, dia 21 di april 2017.

Leave a Reply

Top