KvK a reevalua e structura pa Debate Electoral 2017: Lo brinda e oportunidad pa tur partido politico participa na debate

Directiva di Camara di Comercio y Industria di Aruba (KvK) a reuni ayera pa re-evalua e structura p’e debatenan cu lo wordo organisa prome cu elección dia 22 di september awor.

E motibo tras esaki ta cu KvK a constata cu tin cierto confusion y desacuerdo encuanto e rekisitonan stipula pa participacion n’e debatenan.

 

KvK kier a mantene un balans structura cu un participacion di maximo 6 partido politico, di cual publico general lo por a vota via un encuesta online pa scoge 3 participante, pero en bista di e ultimo desaroyonan KvK lo brinda e oportunidad na tur e 8 partidonan en cuestion, esta ABO, AVP, MAS, MEP, POR, PPA, RED y UPP pa participa n’e prome debate riba 8 di juni proximo.

Den esaki a lubida partido CURPA, ya cu e no a cumpli cu e requisitonan prome cu e fecha stipula pa KvK, según Ernst Mohamed.

 

Directiva di KvK ta kere cu di e forma aki por logra un debate democratico y asina por contribui na un mihor paisahe politico ya cu ta e intencion pa ofrece un debate di calidad y pa debati riba topiconan interesante pa pueblo en general.

E decision aki a wordo tuma despues di re-evaluacion y KvK ta spera cu esaki wordo respeta.

 

Lo tin ticket VIP disponibel p’e debatenan caminda cu lo brinda e oportunidad pa tene combersacion priva cu e participantenan di e debate.

Pa di dos debate cu lo tuma lugar dia 17 di augustus, KvK lo informa e structura na su debido tempo teniendo cuenta cu registracion oficial p’e Eleccion 2017.

Esta ey sigur lo sa caba, cua partidonan sigur lo participa na elección di september awor, ya cu e partidonan cu no tin representación den Parlamento, mester haya firma di sostén. Si no tin sostén, nan no por participa na elección y tampoco n’e di dos debate di KvK.

 

Top